धेरैको अनुमान थियो, पाँच पटकको विश्वविजेता ब्राजिलले समूह चरणमा सहजै जित निकाल्छ । हुन पनि पछिल्लो ४० वर्षसम्म उसले विश्वकपको पहिलो खेलमा जितहीन भएर बस्नुपरेको थिएन । सन् १९७८ यताका सबै विश्वकपको पहिलो खेलमा ब्राजिल हाबी हुँदै आएको थियो । तर, उपाधिको बलियो दाबेदार मानिएको ब्राजिलको ४० वर्षे इतिहास गएराति स्वीजरल्याण्डले चकनाचुर पारिदिएको छ । निकै उत्साहित ब्राजिलियन फुटबलका फ्यान पनि निराश बनेका छन् ।

समूह ई मा रहेको ब्राजिलले आफ्नो पहिलो खेलमा जित निकाल्ने लामोसमयदेखिको इतिहासलाई जोगाउन नसकेको हो । रोस्तोभ एरेनामा भएको खेलमा स्वीट्जरल्याण्डले उपाधिको मुख्य दाबेदारका रुपमा हेरिएको ब्राजिललाई १ १ गोलको बराबरीमा रोक्यो । नेइमार, गाब्रियल जिसस, विलियन, फिलिप कोन्टिन्होसहितको टिटेको बलियो टिमले स्वीट्जरल्याण्डविरुद्ध जित निकाल्न कम संघर्ष गरेन तर सकेन ।

२० औँ मिनेटमा फिलिप कोन्टिन्होको गोलबाट अग्रता लिएपनि ब्राजिलले दोस्रो हाफमा त्यो अग्रता जोगाउन सकेन । स्वीट्जरल्याण्डका लागि ५० औँ मिनेटमा स्टीभन जुबेरले हेडर गोल गर्दै खेललाई बराबरी गोल फर्काए ।

फास्ट मुभिङमा देखिएको ब्राजिलले त्यसपछि स्वीजरल्याण्डतिरको जारी चुमाउन बल नियन्त्रणमा त लियो । तर, बललाई पोष्ट चुमाउन भने सफल हुन सकेन । गाब्रियल जिसस, नेइमार, मार्सेलोसहितका खेलाडीले गोल गर्ने भरपुर प्रयार गरे पनि स्वीजरल्याण्डको डिफेन्सले उनीहरुलाई रोक्यो । झण्डै तीन महिना चोटका कारण मैदान बाहिर रहेर मैदान फर्किएका नेइमार धेरै पटक लडे । यो खेलमा सबैभन्दा बढी लड्ने नेइमार सायदै एक हुन् । बेला–बेला उनले गोल गर्ने प्रयास नगरेका भने होइनन् तर सफल हुन सकेनन् ।

कोन्टिन्होले गरेको लंग रेन्जको सुन्दर गोलबाट लिइएको अग्रता जोगाउन सकेको भए ब्राजिलका लागि यो विश्वकपको सुरुवात राम्रो हुने थियो । जित निकाल्न नसके पनि ब्राजिल हारबाट भने जोगियो । समूह ई मा यसअघि कोस्टारिकालाई हराएका सर्बिया समूहको शीर्ष स्थानमा छ ।

प्रकाशित समय : १५:३७ बजे