रुपन्देहीमा प्रदेशकै सबैभन्दा ठूलो एथ्लेटिक्स स्विमिङ पुलसहितको रिसोर्ट सञ्चालनमा आएको छ । बुटवल उपमहानगरपालिका–१५, ढवाहमा आरम्भ ग्रुप अफ हस्पिटालिटीले आरम्भ रिसोर्ट सञ्चालनमा ल्याएको हो । शैक्षिक कार्यक्रमसहितको यो रिसोर्ट नेपालको सन्दर्भमा पहिलो प्रयोग रहेको कम्पनीका अध्यक्ष बाबुराम महतले दाबी गरे ।

आरम्भ रिसोर्टको प्रदेश ५ का उद्योग, पर्यटन, वन तथा वातावरणमन्त्री लीला गिरिले बिहीबार उद्घाटन गरे । होटल म्यानेजमेन्टमा स्नातक तहको पढाइ हुने प्रदेश ५ को पहिलो मेघा कलेजले दक्ष जनशक्ति उत्पादनमा जोड दिने नीति लिएको छ ।

सानो पुँजी संकलन गरी पब्लिक कम्पनीको रुपमा स्थापित आरम्भ रिसोर्टको चुक्ता पुँजी २० करोड रुपैयाँ छ । तीन बिघामा फैलिएको रिसोर्टमा ५ सयदेखि एक हजार क्षमताको हल छ । साथै, मिटिङ, सेमिनार, गोष्ठी र कन्फिडेन्सियल मिटिङलगायतका लागि प्रयोगमा ल्याउन सकिने हल पनि छन् ।

दानव नदीको किनारमा प्राकृतिक, पारिवारिक र संगीतमय वातावरणमा रमाउन चाहनेको रोजाइमा पर्ने विश्वास रिसोर्टका व्यवस्थापक छविलाल थापाको छ । रिसोर्टले सञ्चालनमा ल्याएको वेस्टर्न मेगा कलेजमा हाल होटल व्यवस्थापनमा स्नातक र एमबीए तहको अध्ययन भइरहेको छ ।

प्रकाशित समय : २३:५८ बजे