अर्थमन्त्री डा. युवराज खतिवडाले मोरङको सुन्दरहैचा नगरपालिका–१० स्थित विराटचोकमा करदाता सेवा कार्यालयको सोमबार उद्घाटन गरेका छन् । पूर्वी मोरङका उद्योगी व्यावसायीलाई आन्तरिक राजश्व कार्यालय विराटनगरबाट हुने सेवा सहजरुपमा प्रदान गर्न विराटचोकमा करदाता सेवा कार्यालयको स्थापना गरिएको हो ।

करदाता कार्यालय स्थापनापछि पूर्वी मोरङका करीब ३८ हजार करदाता प्रत्यक्ष लाभान्वित भएका छन् । कार्यक्रमलाई सम्बोधन गर्दै मन्त्री डा. खतिवडाले संघीयता नै खतरामा पार्ने गरी करको विरोध भएको बताए । सरकारले दोहोरो कर कतै नलिएको बताउँदै उनले जनतालाई असर पर्ने खालको कर नबढाउनसमेत स्थानीय सरकारलाई आग्रह गरे ।

यसैबीच अर्थमन्त्री डा. खतिवडाले सोमबार झापाको दमकस्थित आन्तरिक राजश्व कार्यालयको उद्घाटन गरे । करदाता सेवा कार्यालयबाट चालु आर्थिक वर्षदेखि स्तरोन्नति भएको सो कार्यालयको झापाको कन्काई पश्चिमी क्षेत्रका शिवसताक्षी, गौरादह, दमक नगरपालिका तथा कमल र गौरीगञ्जका करदाताहरुलाई सेवा पुर्याउँदै आएको छ ।

कार्यक्रममा आन्तरिक राजश्व कार्यालय भद्रपुरका प्रमुख बोलराज आचार्यले काठमाडौंबाहिर एकै जिल्लामा दुई आन्तरिक राजश्व कार्यालय झापामा मात्र रहेको जानकारी दिए । सो अवसरमा राजस्व सचिव शिशिरकुमार ढुङ्गाना, आन्तरिक राजश्व विभागका महानिर्देशक बिष्णुप्रसाद नेपाल, झापाका प्रमुख जिल्ला अधिकारी जनकराज दाहाल, दमक नगरपालिकाका प्रमुख रोमनाथ ओलीलगायतको सहभागिता थियो । रासस ।