बलात्कारपछि हतया गरिएकी कञ्चनपुरकी १३ वर्षीया बालिका निर्मला पन्तका आमा–बुबा काठमाडौंबाट कञ्चनपुर फर्किएका छन् ।  न्याय नपाएको भन्दै काठ्माडौं आएका निर्मलाका बुबा यज्ञराज र आमा दुर्गादेवी एक साता काठमाडौं बसेर कञ्चनपुर फर्किएका हुन् ।

प्रधानमन्त्री केपी ओलीसँग सोमबार भेटगरे लगत्तै उनीहरु घर फर्किएका हुन् । न्याय नपाएसम्म कञ्चनपुर नफर्किने उनीहरुको अडान थियो । तर, प्रधानमन्त्रीसँग भेट भएपछि घर  फर्किए ।

‘न्याय नपाएसम्म नफर्किने गरी काठमाडौं आएका थियौं, सरकारले छानबिनका लागि नयाँ समिति बनाएको छ, समितिले बोलाएकाले फर्किएका हौं’, निर्मलाका बुबा यज्ञराजले न्युजकारोबारसँग भने । काठमाडौंमा रहँदा प्रधानमन्त्री र गृहमन्त्रीलाई भेटेर छोरीको हत्यारालाई पक्राउ गर्न माग गरेका थिए ।

भेटमा प्रधानमन्त्री ओलीले ‘निर्मला मेरो पनि छोरी हो’, भन्दै दोषीलाई कारबाही गर्ने प्रतिबद्धता जनाएका थिए । राष्ट्रपति विद्यादेवी भण्डारीलाई भने भेट्न पाएनन् । राष्ट्रपतिले व्यस्त रहेको भन्दै समय नदिएको गुनासो यज्ञराजले गरे ।

निर्मलाको बलात्कारपछि हत्या भएको दुई महिना पुग्न लाग्यो । दोषी पक्राउ परेको छैन । समितिमाथी समिति बनाइएको छ । तर, कुनै पनि समितिले सत्थतथ्य अहिलेसम्म ल्याउन सकिएको छैन । सरकारले बनाएको उच्चस्तरीय समितिले अनुसन्धान सकेर प्रतिवेदन बनाउने काम गरिरहेको छ ।

हत्या गर्ने व्यक्ति र प्रहरीले प्रमाण नष्ट गरेको निष्कर्ष समितिको छ । प्रहरीले भुलवश वा नियतवश प्रमाण नष्ट गरेको हो भन्नेमा समितिले निष्कर्ष निकाल्न नसकेको समितिका संयोजक हरिप्रसाद मैनालीले बताए ।

थप छानबिनका लागि डीआइजी धिरु बस्नेतको संयोजकत्वमा नयाँ समिति बनाइएको छ । समितिले निलम्बन गरिएको प्रहरी अधिकारीका विषमा समेत अनुसन्धान गरिरहेकोे छ ।

यो पनि पढ्नुस्

निर्मलाका बाबुअामाको प्रश्न- प्रधानमन्त्रीज्यू ! छोरीले कहिले न्याय पाउँछिन् ?

प्रकाशित समय : १६:१० बजे