नेपाली कांग्रेसले संविधान दिवसको सन्दर्भमा पत्रकार सम्मेलन गर्दै सरकारको कडा आलोचना गरेको छ । बुधबार पार्टी कार्यालय सानेपामा पत्रकार सम्मेलन गरी कांग्रेसले ११ बुँदामा सरकारको आलोचना गरेको हो ।

संविधान कार्यान्वयनको पछिल्लो अध्याय किन अझै अधुरो भन्दै प्रवक्ता विश्वप्रकाश शर्माले ‘सरकारको कामले संघीयतालाई अलोकप्रिय बनाउन सहयोग गरेको’ आरोप लगाए ।

संघीयतासहितको संविधान बनेर तीन तहका सरकार गठन भए पनि केन्द्रीय सरकारको इच्छाशक्ति र क्षमता प्रस्तुत गर्न नसकेको कांग्रेसको आरोप छ । प्रदेश र केन्द्रबीचको द्वन्द्व सार्वजनिक हुँदा संघीयताप्रति नकरात्मक प्रभाव परेको कांग्रेसको तर्क छ ।

‘राष्ट्रिय प्राकृतिक श्रोत तथा वित्त आयोग निर्माणमा संघीय सरकारले ढिलाइ गरेका कारण जथाभावी कर निर्धारणको स्वन्छन्दताले अन्तत संघीयतालाई अलोकप्रीय बनाउने डिजाइनलाई बल पुगेको छ ।’ विज्ञप्तिमा भनिएको छ ।

सरकार संविधान पालना र संविधानप्रति अपनत्व विस्तारमा चुकेको कांग्रेसको आरोप छ । यस्तै संविधान अनुरुप लोकतान्त्रिक चरित्र नभएको, शान्ति सुरक्षा कायम गर्न नसकेको कांग्रेसले बताएको छ ।

प्रवक्ता शर्माले संविधान कार्यान्वयनको आधार अधुरै रहेको बताए । सरकारकै कमजोरीका कारण संविधान दिवसको अवसरमा कतै कालो दिवससमेत मनाएका दृश्य देखिएको प्रवक्ता शर्माले बताए ।