नेपाल कम्युनिस्ट पार्टी(क्रान्तिकारी माओवादी) का केन्द्रीय महासचिव मोहन बैद्य ‘किरण’ले आफ्नो पार्टीले नयाँ क्रान्तिको संखघोष गर्ने बताएका छन् ।  बुटवलमा सम्पन्न पार्टीको केन्द्रीय कमिति बैठकले गरेका निर्णयबारे जानकारी दिन बुटवलमा आयोजना गरिएको पत्रकार सम्मेलनमा महासचिव किरणले क्रान्तिको सूरुवात गर्ने बताएका हुन् ।

उनले अहिलेको सरकारले दलाल पुजीवादी र  नोकरसाही प्रणालीलाई आत्मसाथ गरेको भन्दै नयाँ  जनवादी क्रान्तिको धारमा अबको यात्रा अगाडि बढ्ने बताए । १० बर्षको जनयुद्ध संसदीय व्यवस्थाको विरुद्धमा भएको जानकारी दिँदै उनले अहिले त्यहि संसदीय व्यवस्थाको पक्षमा सरकारमा लम्पसार हुनु आफैमा लज्जाको विषय भएको  बताए ।

अहिलेको सत्ता पुरानै प्रणाली, सत्तमा केन्द्रित भएको भन्दै उनले त्यसको विरुद्धमा पनि  अबको संघर्ष केन्द्रित हुने बताए । क्रान्तिकारी कम्नुष्टिहरुको बीचमा पार्टी एकता खुल्ला भएको भन्दै उनले अहिले नेपाल कम्युनिस्ट पार्टी(नेकपा) सँगको एकता  भने अहिलेको लागि टुङ्गिएको बताए ।

सरकारले बनाएको प्रदेशिक संरचनामा पहिचान मेटिएको भन्दै उनले लिम्बुवान, खुम्बुवान, मगरात, थारुहट लगाएतका प्रदेश गरी १४ प्रदेशको परिकल्पना गरिएकोमा त्यस विपरितका प्रादेशिक संरचना निर्माण गरिनु निन्दनीय भएको बताए ।  नयाँ जनवादि क्रान्ति नआए सम्मको लागि अहिलेको नरोकिने उनको भनाइ थियो ।

अहिले पनि जनयुद्धका घाईते, बेपत्ता तथा पूर्व लडाकुहरुको समस्या समाधान नभएको भन्दै उनले यि समस्या थाति राखेर  शान्ति प्रक्रियाले पूर्णाता नपाउने जिकिर गरे । अहिलेको सरकारको ८ महिनालाई उनले केही पनि गर्न नसकेको संज्ञा दिए । विकास खर्च शुन्य हुनुको साथै सीमा क्षेत्र मिचाई, नेपालको नक्साबाट भू–भाग गायब  हुने जस्ता कार्यप्रति सरकारले ठोस चासो नदेखाएको भन्दै उनले यसमा गम्भीर हुन आग्रह गरे ।

क्रान्तिकारी माओवादीको बुटवलमा सम्पन्न केन्द्रीय किमिति बैठकले ६ बुँदे घोषण पत्र जारी  गरेको छ । केन्द्रीय सदस्य परि थापाका अनुसार दुई तिहाईको दम्भ प्रर्दशन गरेको बाम तथा कम्युनिस्ट पार्टी नब प्रतिक्रियावादी दलाल सरकार भएको दावी गरे । समृद्ध नेपाल र सुखी नेपाली नाराको धज्जी उडेको उनको तर्क थियो ।