विराटनगरस्थित कोशी अन्चल अस्पतालमा एसीको अभावमा प्रसुति सेवा प्रभावित भएपछि विराटनगर महानरपालिकाले ५ थान एसी अस्पताललाई सहयोग गरेको छ । महानगरपालिकाले  ३ लाख ५० हजार मूल्य बराबरको ए.सी .अस्पताललाई  हस्तान्तरण गरेको हो ।

महानगरपालिकाका प्रमुख भीम पराजुलीले  मंगलबार अस्पतालका मेडिकल सुपरीटेन्डेन डा. रोशन पोखरेललाई अस्पताललाई आवश्यक पर्ने ५ थान एसी हस्तान्तरण गरेका हुन् । मेसु पोखरेलले  अस्पतालको बच्चा वार्ड  तथा लेबर रुममा  एसी नभएकाले  प्रसुति गराउन आएका महिलाहरुलाई समस्या हुने गरेको बताएपछि महानगरले एसीको व्यवस्था गरेको प्रमुख पराजुलीले जानकारी दिए ।

उनले थप २ वटा एसी महानगरपालिकाले उपलब्ध गराउने प्रतिबद्धता पनि जनाए । यसैगरी  महानगरले कोशी अञ्चल अस्पतालको ढल व्यवस्थापनका लागि १० लाख रुपैयाँ छुट्टयाइसकेको  उनले जानकारी दिए ।  एसी अस्तान्तरण कार्यक्रममा  महानगर प्रमुख पराजुली र अस्पतालका चिकित्सक तथा कर्मचारीहरुले प्रसुती तथा बच्चा वार्डको अनुगमन गरेका थिए ।