नेपालका लागि भारतीय राजदूत मञ्जीवसिंह पुरीले निर्माणाधीन जयनगर –जनकपुर रेलमार्ग निरीक्षण गरेका छन । निरीक्षणमा आएका राजदूत पुरी जनकपुर रेल्वे स्टेशनबाट रेल चढेर करिब १० किलोमिटर पूर्वमा पर्ने बैदही स्टेशसनसम्म पुगेका थिए । रेलको चालक कक्षमा बसेर राजदूत पुरीसहित भारतीय विदेश मन्त्रालयका पदाधिकारीहरुले निर्माण कार्यको निरीक्षण गरेका हुन ।

रेल्वे निरिक्षण गरेका राजदुत पुरीले निर्माण गर्न बाँकी कामलाई तीव्रताका साथ समयमै सम्पन्न गर्न निर्देशन दिएका छन् । मंसिरमा जनकपुरमा हुने रामजानकी विवाह महोत्सको बेलामा भारतीय प्रधानमन्त्रि नरेन्द्र मोदीले उद्घाटन गर्ने भनिएको रेल्वेको कामको प्रगति र निरीक्षण गर्न राजदूत पुरी त्यहाँ पुगेका हुन् ।

भारत सरकारको आर्थिक सहयोग र नेपाल सकारको समन्वयमा भारतको जयनगरदेखि महोत्तरीको बर्दिवाससम्म ब्रोडगेज रेल निमार्णका काम भई रहेकोमा पहिलो चरणमा जयनगरदेखि जनकपुरकोे कुर्थासम्म ३४ किलोमिटरमा रेल्वे चलाउने रेल्वे निमार्णकर्ता कम्पनी इर्कनले तयारी थालेको छ ।

कम्पनीले हालसम्म रेलमार्गको विस्तारको क्रममा रेल्वे लिगको साथै स्टेशनहरु निर्माण गरेको भएपनि अहिले सिभिलतर्फका केही कामहरु भने सम्पन्न गर्न बाँकी रहेको छ । ३४ किलोमिटर दुरी रहेको जयनगर जनकपुरका कुर्था रेलखण्डमा १७ किलोमिटरसम्म सफल परीक्षण भइसकेको छ । पहिलो चरणमा साउन २३ मा भारतको जयनगरदेखि खजुरी स्टेशनसम्म करिब साढे ८ किलोमिटर र दोस्रो चरणमा खजुरीदेखि दुहबी स्टेशनसम्म ९ किलोमिटर रेलको परीक्षण गरिएको थियो ।