राजनैतिक आस्थाकै कारण कसैलाई पक्राउ गरेर यातना दिने र विचार अभिव्यक्ति स्वतन्त्रता हनन् गर्न नहुनेमा विराटनगरमा आयोजित एक कार्यक्रमका सहभागीहरुले जोड दिएका छन् ।

क्रान्तिकारी पत्रकार संगठन नेपालले बिराटनगरमा विहीबार आयोजना गरेको मानव अधिकार प्रेस तथा अभिव्यक्त्ति स्वतन्त्रता विषयक अन्तक्र्रियामा सहभागीहरुले यस्तो बताएका हन् । उनीहरुले लोकतान्त्रिक राज्यमा मौलिक अधिकार प्राप्त संविधान निर्माण भएर कार्यान्वयनमा आइसकेकोले संविधानमा उल्लिखित मौलिक अधिकार व्यवहारमा कार्यान्वयन गर्नुपर्नेमा जोड दिए ।

राष्ट्रिय मानव अधिकार आयोगका एक नम्बर प्रदेशका निर्देशक मोहनदेव जोशीले नेपालले मानव अधिकार पक्षका बिभिन्न १८ वटा अभिसन्धिमा हस्ताक्षर गरिसकेकोले लोकतान्त्रिक गणराज्यको सरकारले त्यसलाई पालना गर्नु अनिवार्य दायित्व हुने बताए ।

क्रान्तिकारी पत्रकार संघका केन्द्रीय अध्यक्ष प्रकाश डुम्रेले आस्थाकै आधारमा नागरिकहरुलाई पक्राउ गरेर जेल हाल्नु, हिरासतमा राख्नु र यातना दिनु विश्वव्यापी मानव अधिकारको घोषणा विपरित कार्य भए पनि राज्यले बेवास्ता गरिरहेको आरोप लगाए ।

नेपाल पत्रकार महासंघ एक नम्बर प्रदेश अध्यक्ष बिक्रम लुँइटेलले सत्तामा गएपछि आस्थाको आधारमा नागरिकहरुलाई पक्राउ गर्ने राज्य कनुनी र लोकतान्त्रिक हुन नसक्ने बताए । नेकपा मोरङका संयोजक ऋषि पोखरेलले अब बिद्रोही बनेर अलग अस्तित्व खोज्नु भन्दा पनि सबैले न्याय र समानताका लागि पहल गर्नुपर्नेमा जोड दिए ।

माओवादी का एक नम्बर प्रदेश संयोजक बिमल निरौलाले फरक आस्था राख्ने पार्टीको कार्यकर्ता भएकै कारण नागरिकहरुलाई पटक पटक पक्राउ गरेर जेल र हिरासतमा राखिरहनु संवैधानिक राज्यको खिल्ली हुने बताए । क्रान्तिकारी पत्रकार संगठनले २ असोजबाट ५ नम्बर प्रदेशको दाङबाट मानव अधिकार र प्रेस स्वतन्त्रका लागि देशव्यापी अभियान थालेको हो ।