चेन्नई सुपर किंग्स इन्डियन प्रिमियर लिग (आईपीएल)को फाइनलमा प्रवेश गरेको छ । शुक्रबार राति भएको दोस्रो क्वालिफायरमा दिल्ली क्यापिटल्सलाई ६ विकेटले हराउँदै चेन्नई आठौं पटक आईपीएलको फाइनलमा पुगेको हो ।

विशाखापट्नममा टस हारेर पहिले ब्याटिङ गरेको दिल्लीले निर्धारित २० ओभरमा ९ विकेट गुमाउँदै १ सय ४७ रन बनाएको थियो । मध्यम योगफल बनाउने क्रममा दिल्लीका ऋषभ पन्तले सर्वाधिक ३८ रनको योगदान दिए । पृथ्वी शा ५, शिखर धवन १८, कोलिन मुनरो २७, कप्तान श्रेयस ऐर १३ रनमा आउट भए ।

अक्षर पटेल ३ रन बनाउँदै पभेलियन फर्किए भने शेरफेद रदरफर्ड १० र किमो पल ३ रनमै आउट भए । ईशान्त शर्मा १० र अमित मिश्रा ६ रनमा अविजित रहे । चेन्नईका लागि हरभजन सिंह, दिपक चाहर, रविन्द्र जडेजा र ड्वेन ब्राभोले समान २ विकेट लिए । इमरान ताहिरले एक विकोट हात पारे ।

१ सय ४८ रनको लक्ष्य पछ्याएको चेन्नईले १९ ओभरमा ४ विकेटको क्षतिमा पुरा गर्यो । ओपनर शेन वाटशन र फाफ डु प्लेसिसले उत्कृष्ट प्रदर्शन गरे । डु प्लेसिसले ५० रन जोडे । वाट्शनले पनि ५० रनको योगदान गरे । सुरेश रैना ११, महेन्द्र सिंह धोनी ९ र आम्बाती रायडूले २० रनको योगदान दिए । ईशान्त शर्मा, बोल्ट, अक्षर पटेल र अमित मिश्राले समान १–१ विकेट लिए ।

अब चेन्नाइले उपाधिका लागि मुम्बई इन्डियन्ससँग आइतबार राजिभ गान्धी इन्टरनेसनल क्रिकेट स्टेडियममा प्रतिस्पर्धा गर्नेछ ।

प्रकाशित समय : १२:३८ बजे