नेपाली कथानक चलचित्र ‘घरजम’को विराटनगरमा विशेष प्रदर्शनी हुने भएको छ । मौसम इम्बुङद्वारा निर्देशित सो चलचित्र विराटनगरस्थित सेन्ट्रल मलको सेन्ट्रल मल्टिप्लेक्समा मंसिर ११ गते प्रदर्शन हुने भएको हो ।

यसअघि पाँचथर, इलाम, झापा र सुनसरीमा घरजमको विशेष प्रदर्शन भइसकेको छ । हलहरुमा प्रर्दशन हुनुअघि चलचित्रबारे स्थानीय प्रवुद्ध व्यक्तिहरुसँग प्रतिक्रिया लिनका लागि विशेष प्रर्दशन गरिएको निर्देशक इम्बुङले बताए ।

निर्देशक इम्बुङका अनुसार प्रर्दशनपछि कलाकार, पत्रकार, वुद्धिजिवी, सहित्यकार तथा राजनीतिकर्मीसँग चलचित्रबारे समीक्षा गरिनेछ । चलचित्र र चलचित्रबारे समीक्षा गर्ने परम्परा विकास गर्नका लागि यस्तो कार्यक्रम राखिएको निर्देशक इम्बुङ बताउँछन् । ‘हरेक चलचित्रका राम्रा र नराम्रा पक्ष केलाउने परम्परा स्थापित भए चलचित्र क्षेत्रको विकासमा टेवा पुग्ने मेरो मान्याता हो,’ विशेष प्रदर्शनीबारे जानकारी दिन आयोजित पत्रकार सम्मेलनमा उनले भने ।

विराटनगरमा ‘घरजम’ प्रदर्शनका लागि ‘चलचित्र घरजम प्रर्दशन समिति’ गठन गरिएको छ । किरात याक्थुङ चुम्लुङ, किरात राई यायोख्खा, किरात याक्खा छुम्मा, विराट राजवंशी समाज लगायतका सामाजिक संघ संस्थाहरुले प्रर्दशनका लागि सहयोग गरेका छन् ।

रोमियो फिल्म प्रालिको ब्यानरमा निर्मित ‘घरजम’मा किशोरकुमार पन्धाक र सीताकुमारी तुम्बापो प्रस्तुतकर्ता हुन् भने तेज मेन्याङ्बो सहनिर्माताको रुपमा रहेका छन् । चलचित्रमा बुद्धि तामाङ, सिर्जना सुब्बा, यासेली योङहाङ, रवी शेर्मा, कुशल थलङ, सुष्मा सुब्बा, हेमराज अन्छङ्बोलगायत कलाकारलाई नेपाली मौलिक पात्रको रुपमा देख्न पाइने छ ।

प्रकाशित समय : १७:१८ बजे