कास्कीको पोखरास्थित प्रदर्शनीस्थलमा सत्तारूढ नेपाल कम्युनिस्ट पार्टी (नेकपा)को चुनावीसभालाई लक्षित गरी बम विस्फोट भएको छ । चुनावीसभामा सम्बोधनका लागि नेकपाका कार्यकारी अध्यक्ष पुष्पकमल दाहाल ‘प्रचण्ड’ पुगेलगत्तै १२:४५ बजे विस्फोट भएको हो ।

विस्फोटमा कुनै मानवीय क्षति नभएको कास्की प्रहरीले जनाएको छ । कास्की प्रहरी प्रमुख एसपी दानबहादुर कार्कीका अनुसार सभास्थल प्रदर्शनी केन्द्रबाट २०० मिटर पश्चिम पार्किङ स्थलमा विस्फोट भएको हो ।

विस्फोटमा परी सभाका लागि मान्छे ओसार्न प्रयोग गरिएका दुईवटा सवारी साधनमा क्षति पुगेको छ । पोखरा-सुनौली चल्ने ग. १ ख ८८९१ नम्बरको बस र पोखरा सिटीमा चल्ने ग. १ ख ६७९४ नम्बरको माइक्रो बसमा क्षति पुगेको हो ।

घटनास्थललाई सुरक्षाकर्मीले नियन्त्रणमा लिइसकेको जनाएको छ । विस्फोट कसले गरायो भन्ने खुल्न नसकेको र घटनाबारे थप अनुसन्धान भइरहेको एसपी कार्कीले जानकारी दिए ।

अहिले चुनावी सभालाई प्रचण्डले सम्बोधन गरिरहेका छन् ।

प्रकाशित समय : १८:४७ बजे