किभ । डोनाल्ड ट्रम्पसँगको तीतो मतभेदका कारण युक्रेनमा धेरैले अमेरिकी राष्ट्रपति फेरि रुसको पक्षमा ढल्किएका हुन् कि भन्ने आशंका गरिरहेका बेला राष्ट्रपति भोलोडिमिर जेलेन्स्कीले यस विवादबारे स्पष्ट रूपमा आफ्नो धारणा राखेका छन्।

उनले सीएनएनलाई बताए अनुसार उनी र ट्रम्पबीच कुनै व्यक्तिगत मनमुटाव छैन, तर भ्लादिमिर पुटिनसँग नजिकिनुले “पुटिनलाई अझ बलियो मात्र बनाउनेछ।’ हालैका साताहरूमा अमेरिका र युक्रेनबीचको सम्बन्धमा उल्लेखनीय गिरावट आएको छ।

रुसलाई एक्ल्याउने अन्तर्राष्ट्रिय प्रयासहरूलाई उल्ट्याउँदै मस्कोसँग इन्धन खरिद गर्ने सम्झौताको घोषणा गरेपछि जेलेन्स्कीले ट्रम्प “इतिहासको गलत पक्षमा” रहेको टिप्पणी गरेका थिए। त्यसपछि ट्रम्पले रुसमाथि लगाइएका केही प्रतिबन्धहरू फुकुवा गरिदिए, जसको आफ्नै दलभित्र पनि आलोचना भयो। उता, युक्रेनी सेनाले पनि एलन मस्कद्वारा सञ्चालित ‘स्टारलिंक’ सेवामा आफ्नो पहुँच सीमित भएको पायो।

बिहीबार किएभबाट सीएनएन सँग कुरा गर्दै जेलेन्स्कीले नरम शैली अपनाउँदै भने कि यो तनाव “व्यक्तिगत विषय होइन।” तर, उनले पुटिनको युद्ध रोक्ने कुनै मनसाय नरहेको चेतावनी दिए। “पुटिनप्रति मेरो दृष्टिकोण एकदमै स्पष्ट छ। मलाई लाग्छ, यदि हामीले प्रतिबन्धहरू हटायौं भने हामी उनलाई अझ बलियो बनाउनेछौं। यो राष्ट्रपति ट्रम्प र मबीचको व्यक्तिगत विषय होइन; तर स्वाभाविक रूपमा, म प्रतिबन्धहरू हटाउने कुनै पनि कदमको विपक्षमा छु,” उनले थपे।

साढे चार वर्षभन्दा बढी समयदेखि जारी द्वन्द्वको समाधान खोज्न ट्रम्पका दूतहरूले कूटनीतिक प्रयासलाई पुनः तीव्रता दिइरहेका बेला जेलेन्स्कीले सीएनएनसँग यो कुराकानी गरेका हुन्।

बुधबार, अमेरिकी विशेष दूत स्टिभ विटकफले सेन्ट पिटर्सबर्गमा रुसी राष्ट्रपति भ्लादिमिर पुटिनसँग तीन घण्टा लामो वार्ता गरे। सो क्रममा उनले ७४ वर्षीय अमेरिकी कैदी स्टेफन हबार्डलाई रिहा गर्ने पुटिनको निर्णयलाई लिएर विवादित टिप्पणी गर्दै उनलाई “मानवतावादी” को संज्ञा दिए। विटकफले त्यसको एक दिनअघि नर्वेमा जेलेन्स्कीसँग भेटवार्ता गरेका थिए।

बुधबार ट्रम्पले जोड दिँदै भने कि रुसमाथि प्रतिबन्धहरू कडा पारेको भए हबार्ड जेलमै रहिरहने थिए। सीएनएन की पत्रकार केटलिन कोलिन्सको प्रश्नको जवाफ दिँदै उनले भने, “तπाइँले उनलाई बिर्सिँदा हुन्छ; तपाईंले उनलाई फेरि कहिल्यै देख्नुहुने थिएन, उनी २५ वर्षका लागि जेलमै रहने थिए।”

उनले थपे कि प्रतिबन्धहरू कडा पार्दा युक्रेनसम्बन्धी सम्झौताको सम्भावना जोखिममा पर्न सक्थ्यो: “जब तपाईं कुनै सम्झौताको नजिक हुनुहुन्छ र निकै संवेदनशील वार्ता चलिरहेको हुन्छ, त्यतिबेला प्रतिबन्धहरू लगाइँदैन।”