काठमाडौं । दक्षिणपश्चिम चीनको तिब्बत स्वायत्त क्षेत्रस्थित पहिरो प्रभावित क्षेत्रको थ्रिडी इमेज तयार पारिएको छ ।

चीनले सिजाङ अर्थात तिब्बतमा पहिरो गएका क्षेत्रहरूको त्रि–आयामिक अर्थात थ्रिडी तस्बिर सार्वजनिक गरेको हो ।

चिनियाँ अधिकारीहरुले केरुङ सीमा बन्दरगाहमा शुक्रबार खोजी तथा उद्धार कार्य तीव्र पारेका छन् ।

उद्धारकर्मीहरूले मानिसहरूको ज्यान बचाउन समयसँग प्रतिस्पर्धा गर्दै उद्धार अभियानलाई तीव्रता दिएका हुन् ।

क्षेत्रीय आपत्कालीन व्यवस्थापन विभागका अनुसार शुक्रबार दिउँसो ३ बजेसम्म पाँच जनाको मृत्यु भएको छ भने ५५८ जना अझै बेपत्ता छन्।

बुधबार बिहान नेपालको भूभागमा गएको पहिरो केरुङ जिल्लास्थित केरुङ बन्दरगाहमा पुगेपछि उनीहरू बेपत्ता भएका हुन्। बेपत्तामध्ये २६० जना विदेशी नागरिक रहेको पहिचान भएको छ।

राष्ट्रिय अग्नि तथा उद्धार प्रशासनका अनुसार शुक्रबार बिहान १० बजेसम्म कुल ६८१ जना अग्नि तथा उद्धारकर्मी र ११३ वटा सवारीसाधन दुर्गम पहाडी सीमा क्षेत्रमा पुगिसकेका छन्। साथै, ६ हजार ६१२ थान उद्धार उपकरण तथा रसद सामग्री केरुङ गाउँमा पठाइएको छ।

पहिलो चरणमा १४१ जना उद्धारकर्मी र उच्च उचाइमा उड्न सक्ने एक हेलिकोप्टर बिहीबार बिहान बन्दरगाहमा पुगेका थिए। त्यसपछि चीन खोज तथा उद्धार टोलीका थप १११ जना उद्धारकर्मी बिहीबार दिउँसो केरुङ जिल्लामा पुगेका थिए।

अग्नि तथा उद्धारकर्मीहरूले खोज तथा उद्धारका लागि तीनवटा विशेष टोली गठन गरेका छन्। तीमध्ये एउटा टोलीले जलमार्गमा रबरका डुंगा प्रयोग गरेर, अर्कोले पहाडी भूभागमा पैदल यात्रा गरेर तथा तेस्रोले ड्रोनमार्फत हवाई निरीक्षण र राहत सामग्री आपूर्ति गर्ने गरी काम गरिरहेका छन्।

एक टोलीलाई मुख्य विपद् प्रभावित क्षेत्रमा पठाइएको छ। उक्त टोलीले ड्रोन र दूरबीनको प्रयोग गरी घटनास्थल तथा बनेको तालको नक्साङ्कन, निरीक्षण र लक्षित निगरानी गरिरहेको छ।

आपत्कालीन व्यवस्थापन मन्त्रालयअन्तर्गतको सांघाई अग्नि अनुसन्धान संस्थानका १३ जना विशेषज्ञ पनि घटनास्थलमा पुगेका छन्।

राज्य स्वामित्वको इन्जिनियरिङ तथा उद्धार कम्पनी चाइना एनेङले शुक्रबार १५ सदस्यीय टोली परिचालन गरेको छ।

टोलीले अवरोध तथा आसपासका सडकको स्थलगत सर्वेक्षण गर्न ड्रोन, पोर्टेबल स्याटेलाइट स्टेसन र मोबाइल निगरानी क्यामेरा प्रयोग गरिरहेको छ।

यसको उद्देश्य बनेको तालसम्बन्धी जोखिम व्यवस्थापनका लागि आवश्यक प्रयासमा सही तथ्यांक उपलब्ध गराउनु हो।

उद्धारकर्मीहरूका अनुसार बन्दरगाहभन्दा करिब ३ किलोमिटर माथिल्लो क्षेत्रमा थुप्रिएको ढुंगामाटो अवरोधका कारण बनेको जोखिम समाधान भएपछि मात्र सुरक्षित रूपमा हटाउन सकिनेछ।

प्रकाशित समय : १९:५५ बजे