प्रजातान्त्रिक गणतन्त्र कङ्गो (डीआरसी)मा फैलिएको इबोला भाइरसको सङ्क्रमणबाट मृत्यु हुनेको सङ्ख्या दुई हजार नाघेको छ ।

कङ्गोली स्वास्थ्य अधिकारीका अनुसार हालसम्म इबोलाका चार हजार ३८१ पुष्टि भएका सङ्क्रमणमध्ये दुई हजार ११ जनाको मृत्यु भएको छ ।

यो सङ्ख्या सन् २०१८ देखि २०२० सम्म फैलिएको डीआरसीको सबैभन्दा घातक इबोला प्रकोपमा भएको मृत्युको नजिक पुगेको हो । उक्त प्रकोपमा तीन हजार ५०० सङ्क्रमितमध्ये करिब दुई हजार ३०० जनाको मृत्यु भएको थियो ।

कङ्गोको द्वन्द्वग्रस्त पूर्वी तथा उत्तरपूर्वी क्षेत्रमा फैलिएको पछिल्लो प्रकोपको औपचारिक घोषणा मे १५ मा गरिएको थियो । यद्यपि, योभन्दा केही साताअघिदेखि नै भाइरस फैलिएको अनुमान गरिएको छ ।

यो डीआरसीमा इबोला सङ्क्रमणको १७औँ प्रकोप हो । खोपसम्बन्धी विश्वव्यापी गठबन्धन ‘गाभी’की प्रमुख कार्यकारी सानिया निश्तारले यसलाई देशको इतिहासकै सबैभन्दा ठूलो इबोला प्रकोप रहेको बताएको छन् । उनले यो प्रकोप अझै ठूलो बन्न सक्ने चेतावनी दिएको छन् ।

कङ्गोली स्वास्थ्य अधिकारीले हालको प्रकोपमा इबोलाबाट मृत्यु हुने दर ४५ दशमलव नौ प्रतिशत रहेको बताएका छन् ।

यसैबीच, विश्व स्वास्थ्य सङ्गठन (डब्लुएचओ) का खोपसम्बन्धी विज्ञहरूले हाल फैलिएको इबोलाको स्ट्रेनविरुद्ध उपलब्ध एक मात्र स्वीकृत खोपको प्रभावकारिता परीक्षण गर्न व्यापक मानव परीक्षण गर्न सिफारिस गरेका छन् । हालको प्रकोपमा देखिएको स्ट्रेनविरुद्ध विशेष खोप उपलब्ध छैन ।

‘एर्भेबो’ खोप इबोला भाइरसको बढी सामान्य ‘जायर’ स्ट्रेनविरुद्ध सुरक्षित र प्रभावकारी देखिएको छ । डब्लुएचओका विज्ञहरूका अनुसार प्रारम्भिक तथ्याङ्क, विशेषगरी जनावरमा गरिएको परीक्षणले, कङ्गोमा फैलिएको दुर्लभ ‘बुन्डिबुग्यो’ स्ट्रेनविरुद्ध पनि उक्त खोपले केही सुरक्षा प्रदान गर्न सक्ने देखाएको छ ।

‘बुन्डिबुग्यो’ स्ट्रेनविरुद्ध विकास भइरहेका दुई सम्भावित खोप मानवमा क्लिनिकल परीक्षणको प्रारम्भिक चरणमा छन् । अर्को एक खोपलाई पनि प्रारम्भिक परीक्षणमा लैजाने तयारी भइरहेको छ ।

इबोला सङ्क्रमित व्यक्तिको शारीरिक तरल पदार्थको सम्पर्कबाट सर्ने अत्यधिक सङ्क्रामक रोग भएकोले गम्भीर रक्तस्रावी ज्वरो निम्त्याउन सक्छ ।

प्रकाशित समय : २१:०३ बजे