जनकपुरधाम । कृषि, वन तथा पर्यावरणमन्त्री गीता चौधरीले वन, वातावरण, कृषि, जल, जङ्गल र जमिनको संरक्षणलाई उच्च प्राथमिकतामा राख्नुपर्नेमा जोड दिएको छन् ।

धनुषाको धनुषाधाम नगरपालिकास्थित सबडिभिजन वन कार्यालयमा आयोजित छलफल तथा वृक्षरोपण कार्यक्रममा उनले वन र पर्यावरणको संरक्षणबिना मानव अस्तित्व नै सङ्टमा पर्ने उल्लेख गर्दै प्राकृतिक स्रोतको संरक्षणमा सबै पक्ष जिम्मेवार हुनुपर्ने बताए ।

मन्त्री चौधरीले सडक पूर्वाधारको विकासले मात्र देश समृद्ध नबन्ने उल्लेख गर्दै कृषि, वन, जल, जमिन र वातावरण संरक्षणसँगै समग्र विकासमा जोड दिनुपर्ने धारणा राखे । देश निर्माणका लागि सबै क्षेत्रको सन्तुलित विकास आवश्यक रहेको उनको भनाइ थिए ।

बाल्यकालदेखि ‘हरियो वन नेपालको धन’ र ‘नेपाल कृषि प्रधान देश हो’ भन्ने सुन्दै आए पनि कृषि र वन क्षेत्रले अपेक्षित प्राथमिकता नपाएको उल्लेख गर्दै उनले माटो सुधार कार्यक्रमलाई प्रभावकारी रूपमा सञ्चालन गर्दै प्राकृतिक स्रोत संरक्षणमा सरकार प्रतिबद्ध रहेको बताए ।

प्रत्येक प्रदेशमा एक–एक वटा प्राणी उद्यान स्थापना गर्ने सरकारको योजना रहेको जानकारी दिँदै मन्त्री चौधरीले सोही योजनाअनुसार मधेस प्रदेशमा पनि प्राणी उद्यान निर्माण गरिने बताए ।

उनले सङ्घ र प्रदेश सरकार एउटै राज्य संरचनाका अङ्ग भएकाले आपसी समन्वय र सहकार्यबाट अघि बढ्नुपर्नेमा जोड दिँदै मधेस प्रदेशमा कृषि, वन र वातावरण संरक्षणका लागि सबैपक्ष मिलेर काम गर्नुपर्ने आवश्यकता औँल्याए

प्रकाशित समय : १६:०५ बजे