क्यालिफोर्निया । टेक दिग्गज एलन मस्कले एआईको क्षेत्रमा अहिलेसम्मकै ठूलो लगानी गर्दै ६० अर्ब अमेरिकी डलर बराबरको कोडिङ कम्पनी खरिद गरेका छन् ।

विश्वको पहिलो ट्रिलियनियर बनेका मस्कको कम्पनी स्पेसएक्सले एआई कोडिङ क्षेत्रमा चर्चित स्टार्टअप कर्सरको निर्माता एनिस्फेयरलाई खरिद गर्ने सम्झौता अन्तिम चरणमा पुर्‍याएको हो ।

गत हप्ता मात्रै स्पेसएक्सले अमेरिकी शेयर बजारमा ऐतिहासिक सूचीकरण गरेको थियो, जसपछि कम्पनीको मूल्य २ ट्रिलियन डलरभन्दा बढी पुगेको बताइएको छ । त्यसपछि मस्कले ठूलो स्टक सम्झौतामार्फत यो मेगा डिल अघि बढाएका हुन् ।

यो खरिदमार्फत मस्कले आफ्नो एआई कम्पनी एक्सएआईलाई थप सशक्त बनाउने लक्ष्य राखेका छन् । कम्पनीले एआई बजार आगामी दिनमा २८.५ ट्रिलियन डलरसम्म पुग्न सक्ने अनुमान गरेको छ ।

एआई कोडिङ उपकरणहरूको माग कर्पोरेट र डेभलपरहरूबीच तीव्र रूपमा बढिरहेको छ, जसले सफ्टवेयर कोड तथा डिजाइन प्रक्रियालाई सहज बनाउने बताइन्छ ।

हाल एआई बजारमा ओपनएआई र एन्थ्रोपिक जस्ता कम्पनीहरूको प्रभुत्व रहे पनि कर्सरले आफ्नो प्रभावशाली कोडिङ क्षमताका कारण विकासकर्ताहरूलाई आकर्षित गर्दै आएको छ ।

सम्झौतापछि मस्कले ‘ग्रोक बिल्ड’ नामक उन्नत कोडिङ उपकरण सार्वजनिक गर्ने तयारी गरेको बताइएको छ, जसले ग्रोक एआई र कर्सरलाई एकीकृत गर्नेछ ।

सम्झौताको खबरपछि स्पेसएक्सको मूल्यमा उल्लेख्य वृद्धि भएको र कम्पनीको बजार मूल्य २.५३ ट्रिलियन डलर पुगेको दाबी गरिएको छ ।

सन् २०२२ मा सुरु भएको कर्सर स्टार्टअपले छोटो समयमा नै वार्षिक २.६ अर्ब डलर राजस्व हासिल गरेको बताइएको छ ।

प्रकाशित समय : ०९:३६ बजे