काठमाडौं । विश्व वातावरण दिवस २०२६ को अवसरमा मेटलाइफ नेपालले जुन ६, २०२६ मा शंखरापुर नगरपालिका अन्तर्गत पर्ने पताप गाउँमा वृहत् वृक्षारोपण स्वयंसेवी कार्यक्रम सफलतापूर्वक सम्पन्न गरेको छ। उक्त कार्यक्रम मेटलाइफ फाउन्डेसनको आर्थिक सहयोग तथा आर्बर डे फाउन्डेसन र फिल्ड इन्स्टिच्युट फर इकोकल्चरल रिस्टोरेशन (इकोकल्चर) सँगको सहकार्यमा कार्यान्वयन गरिएको थियो।

काठमाडौंबाट करिब ४५ मिनेटको दूरीमा रहेको पताप गाउँमा आयोजित कार्यक्रममा मेटलाइफ नेपालका करिब ५० जना सहकर्मीहरूले एफ–०२६ राजमार्ग तथा शंखरापुर सडक करिडोर आसपास ५०० वटा फलफूल, बदाम तथा स्थानीय प्रजातिका बिरुवाहरू रोपेका थिए। यस पहलले एकल बाली प्रणाली (मोनोकल्चर फार्मिङ) बाट दिगो कृषि–वन प्रणाली (एग्रोफरेस्ट्री) तर्फको रूपान्तरणलाई प्रोत्साहन गर्ने लक्ष्य राखेको छ। वातावरणीय संरक्षणसँगै स्थानीय समुदायका लागि दीर्घकालीन आम्दानीका अवसर सिर्जना गर्ने उद्देश्यले टिमुर, ओखर तथा आरुका बिरुवाहरू छनोट गरी रोपिएका हुन्।

हिमाली क्षेत्रको फेदीमा अवस्थित पताप गाउँ माटो कटान, बाढी तथा पहिरोजस्ता वातावरणीय जोखिमप्रति संवेदनशील रहँदै आएको छ। जैविक विविधताको संरक्षण, जमिनको स्थायित्व अभिवृद्धि तथा पुनःवनरोपण र कृषि अभ्यासको संयोजनमार्फत समुदायको उत्थानशीलता सुदृढ गर्ने उद्देश्यले यो पहल सञ्चालन गरिएको हो। वृक्षारोपण गरिएका बिरुवाहरूको उचित संरक्षण तथा दीर्घकालीन अनुगमन सुनिश्चित गर्न फिल्ड इन्स्टिच्युटले स्थानीय समुदायसँग निरन्तर सहकार्य गर्नेछ।

कार्यक्रमबारे आफ्नो धारणा व्यक्त गर्दै मेटलाइफ नेपालका महाप्रबन्धक निर्मल काजी श्रेष्ठले भन्नुभयो, “यो परियोजनाले मेटलाइफको उद्देश्यलाई व्यवहारमा उतारेको छ। मेटलाइफ फाउन्डेसन तथा हाम्रा विश्वसनीय साझेदारहरूको अमूल्य सहयोगमा हामी समुदायसँग हातेमालो गर्दै वातावरणीय प्रणालीको पुनर्स्थापना, जीविकोपार्जनका अवसरहरूको प्रवर्द्धन तथा भावी पुस्ताका लागि दिगो वातावरणीय उत्थानशीलता निर्माण गर्न पाउँदा गर्व महसुस गर्दछौं।”

मेटलाइफ फाउन्डेसनबारे

मेटलाइफ फाउन्डेसन समावेशी आर्थिक गतिशीलतालाई अगाडि बढाउन प्रतिबद्ध छ। यसले गैर–नाफामुखी संस्थाहरूसँग सहकार्य गर्दै आर्थिक सशक्तीकरण, वित्तीय स्वास्थ्य तथा उत्थानशील समुदाय निर्माणजस्ता तीन रणनीतिक क्षेत्रमा केन्द्रित अनुदान प्रदान गर्छ। साथै, प्रभाव विस्तार गर्न मेटलाइफका कर्मचारी स्वयंसेवकहरूलाई पनि सक्रिय रूपमा संलग्न गराउँछ।

मेटलाइफ फाउन्डेसन सन् १९७६ मा मेटलाइफको कर्पोरेट योगदान तथा सामुदायिक संलग्नताको लामो परम्परालाई निरन्तरता दिन स्थापना गरिएको थियो। स्थापना भएदेखि नै यसले मेटलाइफको उपस्थिति रहेका समुदायहरूलाई सशक्त बनाउन १ अर्ब अमेरिकी डलरभन्दा बढी योगदान गरिसकेको छ।

आर्बर डे फाउन्डेसनबारे

आर्बर डे फाउन्डेसन एक विश्वव्यापी गैरनाफामूलक संस्था हो, जसले मानिसहरूलाई रुख रोप्न, संरक्षण गर्न तथा तिनको महत्त्वलाई उत्सवका रूपमा मनाउन प्रेरित गर्छ। रुखहरूको शक्तिमार्फत अझ आशावादी र समृद्ध भविष्य निर्माण गर्न सकिन्छ भन्ने विश्वासका साथ यस संस्थाले १० लाखभन्दा बढी नेतृत्वकर्ता, नवप्रवर्तक, वृक्षारोपणकर्ता तथा समर्थकहरूको विश्वव्यापी समुदायलाई एकताबद्ध गरेको छ।

पछिल्ला ५० वर्षभन्दा बढी समयदेखि संस्थाले आफ्ना साझेदारहरूसँग मिलेर विश्वभरका वातावरणीय चुनौतीहरूको सामना गर्दै ५० करोडभन्दा बढी रुख रोपिसकेको छ। र यो यात्रा केवल सुरुवात मात्र हो।

आर्बर डे फाउन्डेसन संयुक्त राज्य अमेरिकाको 501(c)(3) अन्तर्गत दर्ता भएको एक गैरनाफामूलक संस्था हो, जसले रुखहरूको शक्तिमार्फत सबै जीवजन्तु तथा मानव जीवन समृद्ध हुने भविष्य निर्माण गर्ने लक्ष्य राखेको छ।

प्रकाशित समय : १६:५२ बजे