तुलसीपुर । राप्ती प्रादेशिक अस्पतालको डेढ बिघा जग्गा अतिक्रमणमा परेको पाइएको छ । अतिक्रमित जग्गा छुट्याउन गरिएको नापजाँचको प्रारम्भिक प्रतिवेदनअनुसार करिब डेढ बिघा जग्गा अतिक्रमणमा परेको देखिन आएको छ ।

जिल्ला प्रशासन कार्यालयको प्राविधिकको टोलीले आज नापजाँच गरेको हो । अस्पताल विकास समितिका अध्यक्ष महेन्द्र लामिछानेका अनुसार ५० बढी घर अतिक्रमित जग्गामा बनेको प्रारम्भिर ‘रिपोर्ट’ आएको छ ।

सबैभन्दा बढी उत्तरतिर अतिक्रमणमा परेको छ भने पश्चिम रानीजरुवा र पूर्वतिर पक्की घरहरू बनेका पाइएको उनको भनाइ छ । अस्पतालको करिब डेढ बिघा जग्गा अतिक्रमणमा पर्दा अस्पतालका संरचना विस्तारमा समस्या हुने गरेको अध्यक्ष लामिछानेले बताए ।

प्राविधिकसहितको टोलीले नापजाँच गरेकाले विस्तृत प्रतिवेदन आएपछि जग्गा खाली गर्ने प्रक्रिय अघिबढाउने उनको भनाइ छ । अतिक्रमित जग्गाको दाङका प्रमुख जिल्ला अधिकारी विश्वप्रकाश अर्यालसहितको टोलीले पनि अनुगमन गरेको थियो ।

प्रकाशित समय : १७:१७ बजे