१९ औं माछापुच्छ्रे गण्डकी प्रदेश स्तरीय फुल कन्ट्याक्ट तथा प्रथम नेपाल क्योकुशिन कान प्रतियोगिता २०७६ पुस २९ गते र माघ १ गते हुने भएको छ ।

नेपाल क्युकोसिन कान कराँते संघ कास्की शाखाको आयोजनामा पोखरा रंगशालामा पुस २९ गते र ढुंगेसाँघुमा माघ १ गते हुनेछ । प्रतियोगितामा गण्डकी प्रदेशका १ सय ५० भन्दा बढी खेलाडी सहभागी हुनेछन् ।

पूरुषतर्फ २५, ३० ३५, ४०, ४५, ५०, ५५ र ६० केजी मुनी र खुला तौल समूहमा प्रतियोगिता हुनेछ । महिलातर्फ ३५, ४०, ४५, ५० र खुला तौल समूहमा प्रतियोगिता हुने संघका सल्लाहकार तथा गण्डकी प्रदेश प्रमुख दीपकबहादुर गोदारले जानकारी दिए ।

प्रतियोगितामा पहिलो, दोस्रो र तेस्रो हुनेलाई सिल्ड, मेडल प्रमाणपत्र र खादाले सम्मान गर्ने गोदारले बताए । प्रतियोगिता आयोजना गर्न ५ लाख रुपैयाँ खर्च हुने अनुमान गरिएको प्रतियोगिताबाट २ लाख रुपैयाँ बचत अपेक्षा रहेको नेपाल क्योकुशिन कान कास्की शाखा अध्यक्ष बेलबहादुर थापाले जानकारी दिए ।

बचत रकमबाट संघले खेलाडीलाई आवश्यक पर्ने म्याट, प्याड र ग्लोब किन्ने थापाले जानकारी दिए । संघका खेलाडीले यसभन्दा पहिला जापान, भियतनाम र युरोपमा विभिन्न देशलगायतमा अन्तर्राष्ट्रिय प्रतियोगितामा सहभागी भएर पदक जितेको थापाले बताए ।

संघले अघिल्लो वर्ष गरेको १८ औं माछापुच्छ्रे गण्डकी प्रदेश स्तरीय फुल कन्ट्याक्ट प्रतियोगिता २०७५ मा ८० हजार रुपैयाँ बचत गरेको प्रतियोगिता संयोजक दानबहादुर क्षेत्रीले जानकारी दिए । संघले यो बचतबाट म्याट, प्याडलगायत खलाडीलाई आवश्यक पर्ने ५ लाख रुपैयाँ बराबरको सामान किनेको क्षेत्रीले बताए ।

प्रकाशित समय : १५:०० बजे