कञ्चनपुर । आगामी फागुन २१ गते हुन गइरहेको प्रतिनिधिसभा सदस्य निर्वाचनका लागि कञ्चनपुरका तीन वटै निर्वाचन क्षेत्रमा दुई हजार एक सय ६६ कर्मचारीलाई खटाइने भएको छ ।

जिल्ला निर्वाचन कार्यालयका सूचना अधिकारी भानबहादुर महराका अनुसार तीन वटै निर्वाचन क्षेत्रमा तीन सय ६० स्थायी र दुई अस्थायी मतदान केन्द्र छन् । प्रत्येक स्थायी निर्वाचन केन्द्रमा छ जनाका दरले कमर्चारी खटाइने छ । प्रत्येक निर्वाचन केन्द्रमा एकजना मदान अधिकृत, एक जना सहायक मतदान अधिकृत, तीन जना सहायक कर्मचारी र एक जना कार्यालय सहयोगीलाई खटाउने व्यवस्था मिलाइएको छ ।

अस्थायी निर्वाचन केन्द्रमा भने तीन जना कर्मचारीलाई खटाइने छ । जसमा एक जना मतदान अधिकृत, एक जना सहायक मतदान अधिकृत र एकजना कार्यालय सहयोगीलाई खटाइने छ ।

निर्वाचनमा निजामतीतर्फका स्थायी कर्मचारी, स्थायी शिक्षक र संस्थानका कर्मचारीलाई सम्बन्धित निर्वाचन क्षेत्रका निर्वाचन अधिकृतले खटाउने व्यवस्था रहेको छ । प्रत्येक निर्वाचन केन्द्रमा स्वयमसेवकको नियुक्ति भने सम्बन्धित मतदान अधिकृतले गर्ने छन् ।

केही दिनभित्रै निर्वाचनमा खटिने कर्मचारीको विवरण सङ्कलन र खटनपटनको कार्य अगाडि बढाइने निर्वाचन क्षेत्र नं २ का निर्वाचन अधिकृत प्रकासबहादुर भण्डारीले बताए ।

कञ्चनपुरको निर्वाचन क्षेत्र नं १ मा एक सय २२, निर्वाचन क्षेत्र नं २ मा एक सय २३ र निर्वाचन क्षेत्र नं ३ मा एक सय १५ गरी कूल तीन सय ६० मतदान केन्द्र रहेका छन् । विगतको भन्दा यस निर्वाचनमा मतदाताको चापलाई मध्यनजगर गरी १४ वटा मतदान केन्द्र थप गरिएका छन् भने दुई वटा अस्थायी मतदान केन्द्र राख्ने व्यवस्था गरिएको छ ।

निर्वाचन क्षेत्र नं १ मा एक लाख एक हजार ७२४, निर्वाचन क्षेत्र नं २ मा एक लाख नौ हजार ५७४ र निर्वाचन क्षेत्र नं ३ मा एक लाख तीन हजार ८७ गरी तीन लाख १४ हजार ३८५ मतदाता रहेका छन् । जसमा पुरुष मतदाताको सङ्ख्या एक लाख ५४ हजार ६८ रहेको छ भने महिला मतदाताको सङ्ख्या एक लाख ६० हजार ३१६ छ ।

प्रकाशित समय : १३:१९ बजे