किलियन एमबाप्पेप्रेरित स्पेनिस लिग लिडर रियाल मड्रिडले यूईएफए च्याम्पियन्स लिगमा पुनरागमन जित निकालेको छ ।

मंगलबार घरेलु मैदान सान्टियागो बर्नाबेउमा सम्पन्न खेलमा रियाललाई जित दिलाउन दुवै गोल एमबाप्पेले गरे । मार्सेका टिमोथी वेहले गोल गरे ।

खेलको २२औँ मिनेटमा वेहको गोलमार्फत मार्सेले अग्रता लिएको थियो । तर, पाहुना टिमको यो अग्रता लामो समय टिक्न भने सकेन ।

६ मिनेटपछि नै एमबाप्पेले पेनाल्टीमार्फत रियालका लागि बराबरी गोल गरे । मार्सेका रक्षक जेफ्री कोन्डोग्बियाले रोड्रिगोलाई बक्सभित्र लडाएपछि रियालले पेनाल्टी अवसर पाएको थियो ।

रक्षक ड्यानी कार्भहालले रातो कार्ड व्यहोर्दै मैदान छाडेपछि ७२औँ मिनेटमा रियाल १० खेलाडीमा समेटिएको थियो । मार्सेका गोलकिपर जेरोनिमो रुलीलाई टाउकाले प्रहार गरेपछि रेफ्रीले उनलाई सिधै रातो कार्ड देखाएका थिए ।

एमबाप्पेले ८१औँ मिनेटमा पेनाल्टीमार्फत नै व्यक्तिगत दोस्रो गोल गर्दै रियाललाई पुनरागमन जित दिलाए । मार्सेका रक्षक फाकुन्डो मेडिनाले बक्सभित्र ह्यान्ड गरेपछि भीएआरको सहायतमा रियाललाई पेनाल्टी अवसर प्रदान गरिएको थियो ।

मंगलबार नै भएको अर्को खेमा आर्सनलले एथ्लेटिक बिल्बाओविरुद्ध २–० को जित दर्ता गरेको छ ।

बिल्बाओको मैदानमा भएको खेलमा आर्सनललाई जित दिलाउन ग्याब्रियल मार्टिनेली र लियान्ड्रो ट्रोसार्डले गोल गरे । आर्सनलले दुवै गोल दोस्रो हाफमा गरेको हो ।

प्रकाशित समय : १०:३६ बजे