नेपाल राष्ट्र बैंकका कायम मुकायम गभर्नर डा. निलम ढुंगानाले राष्ट्र बैंकका कार्यकारी निर्देशक डा. गुणाकर भट्टको राजीनामा स्वीकृत गर्न अझै अटेर गरेकी छिन् ।

उपप्रधानमन्त्री तथा अर्थमन्त्री विष्णुप्रसाद पौडेलको निर्देशन पालनामा ढुंगानाले अटेरी गरेकी हुन् । कामु गभर्नर ढुंगानालाई अर्थमन्त्री विष्णु पौडेलले कार्यकारी निर्देशक डा. गुणाकर भट्टको राजीनामा स्वीकृत गर्न अघिल्लो आइतबार नै निर्देशन दिएका थिए ।

सत्तारूढ गठबन्धनका प्रमुख दलहरू नेपाली कांग्रेस र नेकपा एमालेबीच डा.भट्टलाई राष्ट्र बैंकको गभर्नर नियुक्त गर्ने सहमति भएको चर्चा सार्वजनिक भएपछि भट्टले कार्यकारी निर्देशक पदबाट राजीनामा दिएका थिए । तर, आफूसमेत गभर्नरको आकांक्षी रहेको भन्दै कामु गभर्नर डा. ढुंगाना प्रतिस्पर्धीलाई बाटो सहज नगर्ने पक्षमा अडिक रहेकी छन् ।

राष्ट्र बैंक ऐनले गभर्नर पद रिक्त नहुने परिकल्पना गरे पनि दलहरूको छिनाझम्टीले रिक्त भएको लामो समय नाघिसक्दा पनि नियुक्ति हुन सकेको छैन । र महाप्रसाद अधिकारीको कार्यकाल सकिँदासमेत राष्ट्र बैंकले नयाँ गभर्नर पाउन सकेको छैन ।

प्रकाशित समय : १५:५७ बजे