नेपालकै अग्रणी डिजिटल भुक्तानी सञ्जाल फोनपेले सूचना तथा सञ्चार प्रविधि (आईसीटी) क्षेत्रको सर्वाधिक कर तिर्ने संस्थाका रूपमासरकारबाट औपचारिक रूपमा सम्मान प्राप्त गरेको छ । उक्त सम्मान काठमाडौंमा आयोजित विशेष समारोहमार्फत ८औं राष्ट्रिय आईसीटी दिवसको अवसरमा प्रदान गरिएको हो । सम्मान पत्र प्रधानमन्त्री केपी शर्मा ओलीद्वारा फोनपेका प्रमुख कार्यकारी अधिकृत दिवास कुमारलाई प्रदान गरिएको थियो ।

यो सम्मानले कम्पनीको करदाताको रूपमा देखाएको उत्तरदायित्व र नेपालको डिजिटल प्रवद्र्धनमा गरेको योगदानको उच्च मूल्याङ्कन गर्छ । फोनपेले नेपालको आइसीटी इकोसिस्टमको विकास र वृद्धिमा खेलेको महत्वपूर्ण भूमिकालाई यस सम्मानले थप प्रस्ट्याउँछ ।

डिजिटल वित्तीय सेवा क्षेत्रमा अग्रणी कम्पनीका रूपमा फोनपेले सधैं नगदरहित अर्थतन्त्रको प्रवद्र्धन, वित्तीय समावेशीकरण, र व्यवसाय तथा उपभोक्तालाई सशक्त बनाउने समाधानहरू विकास गर्न प्रतिबद्ध रहँदै आएको छ । “सरकारबाट प्राप्त यो सम्मान हाम्रो लागि अत्यन्त गौरवको विषय हो,” फोनपेका प्रमुख कार्यकारी अधिकृत दिवास कुमारले भने । “फोनपेमा हामी जिम्मेवार कर्पोरेट नागरिकता र नवीनताबीच गहिरो सम्बन्ध रहेको विश्वास गर्छौं ।

यो सम्मानले नेपालको डिजिटल अर्थतन्त्रलाई मजबुत बनाउने हाम्रो प्रतिबद्धतालाई अझ सुदृढ बनाएको छ, साथै आइसीटी क्षेत्रको अग्रणी संस्था रूपमा हाम्रो दायित्वप्रति हामी अझ सजग रहन्छौं ।”

प्रकाशित समय : १६:३१ बजे