नेपाल बीमा प्राधिकरणले आइपीओमार्फत् उठेको प्रिमियम वापत उठेको रकम जगेडा कोषमा राख्न बीमा कम्पनीहरुलाई निर्देशन दिएको छ। प्राधिकरणले बुधबार कम्पनीहरुलाई यस्तो निर्देशनसहितको पत्र पठाएको हो ।

सार्वजनिक लेखा समितिले पौष १२ गते बीमा कम्पनीहरुले प्रिमियममा आइपीओ जारी गरेको विषय सच्याउन प्राधिकरणलाई निर्देशन दिएको थियो । बीमा कम्पनीहरुलाई प्रिमियममा सेयर बिक्री गर्न नेपाल बीमा प्राधिकरणले स्वीकृत दिनु बीमा ऐनको विपरीत र सर्वसाधारण लगानीकर्ताको हित विपरीत देखिएको भन्दै सो कार्यलाई तत्काल सच्याउन लेखा समितिले नेपाल बीमा प्राधिकरणलाई निर्देशन दिएको थियो ।

लेखा समितिको निर्देशनपछि प्राधिकरणले प्रिमियम वापत उठेको रकम जगेडा कोषमा राख्न बीमा कम्पनीहरुलाई निर्देशन दिएको छ। यस विषयमा हिमालयन रि ईन्स्योरेन्स विरुद्ध सर्वोच्च अदालतमा मुद्दा समेत परेको छ । अदालतको आदेश पछि सोहि अनुसार गर्ने गरि प्राधिकरणले हाल कम्पनीहरुलाई प्रिमियम रकम जगेडामा राख्न भनेको हो । यता कम्पनीहरुभने सो रकमबाट बोनस सेयर जारी गरेर चुक्ता पुँजी बढाउँने योजनामा थिए ।

हिमालयन रि ईन्स्योरेन्ससहित ५ बीमा कम्पनीले प्रिमियममा आइपीओ जारी गरेका छन् । जसमध्ये आइएमई लाइफ, सिटिजन्स लाइफ, सन लाइफ नेपाल र रिलायबल नेपाल लाइफ रहेका छन् । यी सबै कम्पनीलाई प्राधिकरणले प्रिमियम वापत उठेको रकम जगेडा कोषमा राख्न निर्देशन दिएको हो ।

प्रकाशित समय : १२:१६ बजे