निर्वाचन आयोगले कुनै एउटा राजनीतिक दलको सदस्य अर्को राजनीतिक दलबाट उम्मेदवार हुन नपाउने गरी विधेयक तयार पारेको छ । कुनै राजनतिक दलको सदस्यरहेको व्यक्ति त्यस्तो दलको सदस्य पद त्याग नगरी अर्को राजनीतिक दलको तर्फबाट उम्मेदवार हुन सक्ने छैन ।

निर्वाचन आयोगले बनाएको निर्वाचनसम्बन्धी कानुनलाई संशोधन र एकीकरण गर्न बनेको विधेयक’मा एउटा दलको सदस्य अर्को दलतबाट उम्मेदवार हुन नपाउने व्यवस्था गरिएको हो ।

यसअघिका निर्वाचनमा एउटा पार्टीका अध्यक्ष अर्को पार्टीको चुनाव चिह्न लिएर उठ्ने गरेका थिए । अब यो विधेयक संसदबाट पास भएमा एउटा पार्टीको सदस्य अर्को पार्टीको उम्मेदवार हुन पाउने छैन ।

विधेयकको दफा ६२ को २ मा भनिएको छ, ‘प्रतिनिधिसभा सदस्य वा प्रदेशसभा सदस्यमा समानुपातिक निर्वाचन प्रणालीबाट दुईपटक निर्वाचित भइसकेको व्यक्ति सोही निर्वाचन प्रणालीबमोजिम उम्मेदवार हुन सक्ने छैन । दुईपटकभन्दा बढी समानुपातिक उम्मेदवार हुन नपाउने व्यवस्था पनि विधेयकमा ल्याइएको छ ।

निर्वाचन खर्चको विवरण पेस गर्नुपर्ने दायित्व भएको व्यक्तिले निर्धारित समयभित्र त्यस्तो विवरण नबुझाएमा त्यस्तो व्यक्ति छ वर्षसम्म निर्वाचनमा उम्मेदवार हुन नसक्ने प्रावधान पनि विधेयकमा राखिएको छ ।

त्यसैगरी, सङ्घीय संसद, प्रदेशसभा वा स्थानीय तहको सदस्य पदमा उम्मेदवार भई पराजित भएको व्यक्ति त्यस्तो पदको कार्यकाल पूरा नभएसम्म कुनै पनि तहको निर्वाचनमा उम्मेदवार बन्न नसक्ने प्रावधान पनि विधेयकमा राखिएको छ । आफ्नो निर्वाचन क्षेत्रमा पराजित भएपछि अर्को क्षेत्रमा हुने उपनिर्वाचनमा भाग लिने क्रम बढेपछि आयोगले यो प्रावधान ल्याएको हो ।

स्थानीय तहको सदस्य पदमा बहाल रहेको व्यक्तिले पदबाट राजीनामा नदिई स्थानीय तहको कुनै पनि पदमा उम्मेदवार हुन नपाउने प्रावधान विधेयकमा ल्याइएको छ ।

प्रकाशित समय : १७:२३ बजे