उपराष्ट्रपतिको उम्मेदवार चयन गर्न प्रधानमन्त्रीको सरकारी निवास बालुवाटारमा जारी आठ दलीय गठबन्धनको बैठकमा प्रतिनिधिसभा सदस्य प्रभु साह पनि सहभागी भएका छन् ।

गत मंसिर ४ मा सम्पन्न प्रतिनिधिसभा निर्वाचनमा रौतहट क्षेत्र नम्बर ३ बाट स्वतन्त्र उम्मेदवारी दिएर सांसद पदमा विजयी साहले पछि ‘आम जनता पार्टी’ निर्वाचन आयोगमा दर्ता गराएका छन् ।

साहको सहभागितासँगै गठबन्धन नौ दलीयबाट दस दलीय भएको छ । किनकि यसअघि आठ दलीय गठबन्धनमा बाबुराम भट्टराई पनि सहभागि भएका छन् ।

उपराष्ट्रपति पदमा गठबन्धनका जसपा, नागरिक उन्मुक्ति पार्टी र जनमत पार्टीले दाबी गरेका छन् ।

गठबन्धनमा सहमति हुनुअघि नै जसपाले संसदीय दलका नेता रामसहायप्रसाद यादव, जनमतले ममता झा र नागरिक उन्मुक्तिले रञ्जिता श्रेष्ठ चौधरीलाई उपराष्ट्रपति पदमा उम्मेदवार बनाउने भनेका छन् ।

तर नागरिक उन्मुक्तिकी अध्यक्ष श्रेष्ठ उमेरका कारण उपराष्ट्रपति पदका लागि अयोग्य छिन्। किनभने संवैधानिक व्यवस्थाअनुसार उपराष्ट्रपतिको उम्मेदबार बन्न ४५ वर्ष पुगेको हुनुपर्छ।

आगामी चैत ३ गते हुने उपराष्ट्रपति निर्वाचनका लागि आज उम्मेदवारी दर्ता हुनेछ।

राष्ट्रपति पदमा भने गठबन्धनका तर्फबाट नेपाली कांग्रेसका वरिष्ठ नेता रामचन्द्र पौडेल निर्वाचित भइसकेका छन् ।

प्रकाशित समय : १०:५९ बजे