भक्तपुर युवा टीमको आयोजनामा भइरहेको दोस्रो भक्तपुर कप–२०७९ खुला फुटबल प्रतियोगिता शनिबार पनि जारी रहेको छ । आज तीन वटा खेल भएका थिए । जसमा हेल्डी फुटसल, सुर्यविनायक नगरपालिका र केदारनाथ सुटरले जित हासिल गरेका थिए ।

आजकाे पहिलो खेल सिद्धि गणेश खेलकुद समिति र हेल्डी फुटसलबीच भएकाे थियाे। खेलमा हेल्डी फुटसलले सिद्धि गणेश खेलकुद समितिलाई ०–२ ले पराजित गरी दोस्रो चरणमा प्रवेश गर्न सफल भएका छन् । उक्त खेलबाट हेल्डी फुटसलबाट प्रणय बासुकला उदयीमान खेलाडी घोषणा भए भने सोही टीमका लोक तामाङ खेलको उत्कृष्ट खेलाडी घोषणा भएका छन् ।

त्यस्तै दोस्रो खेल सूर्यविनायक नगरपालिका र सोल्टी नेपालबीच भएकाे थियाे । खेलमा सूर्यविनायक नगरपालिकाले सोल्टी नेपाललाई १–३ ले पराजित गरी दोस्रो चरण प्रवेश गर्न सफल भएका छन् । खेलबाट सोल्टी नेपालका अनिल नगरकोटी उदयीमान खेलाडी घोषणा भएका छन् भने सूर्यविनायक नगरपालिकाका प्रज्वल कार्की उत्कृष्ट खेलाडी घोषणा भएका छन् ।

शनिबार नै सम्पन्न केदारनाथ सुटर्स र पीएफसी पाण्डुबजारबीचको तेस्रो खेलमा केदारनाथ सुटरले पीएफसीलाई १–३ ले पराजित गरी दोस्रो चरणमा प्रवेश गर्न सफल भएका छन् । खेलबाट केदारनाथ सुटर्सका सतिश सुवाल उत्कृष्ट खेलाडी घोषणा भएको छ भने पीएफसीका पुजन खड्का उत्कृष्ट खेलाडी घोषणा भएका छन् ।

प्रतियोगिताको तेस्रो दिन आइतबार द हिलिङ्ग होम एफसी र सृजनानगर एफसीबीच पहिलो खेल हुनेछ भने दोस्रो खेल सीओबी र एपीएफ बलम्बुबीच हुनेछ । प्रतियोगिताको फाइनल फागुन १३ गते शनिबार हुनेछ ।

प्रकाशित समय : १७:४४ बजे