लुम्बिनी जनरल इन्स्योरेन्सले बिहीबार मिनभवनस्थित विश्व शान्ति बिहारमा रहेका विश्व शान्ति बौद्ध शिक्षालयमा भिक्षु शिक्षामा अध्ययनरत विद्यार्थीहरूका लागि छात्रवृत्ति प्रदान गरेकाे छ ।

१० जना विद्यार्थीका लागि प्रतिविद्यार्थी वार्षिक १२ हजारको दरले १ लाख २० हजार रूपैयाँ बराबरको छात्रवृत्ति प्रदान गरिएकाे हाे । कम्पनीले गत माघ २२ गते निधन भएका आफ्ना संस्थापक अध्यक्ष हिमालय शमशेर राणाको १२औं दिनको पुण्यतिथिका अवसरमा उक्त छात्रवृत्ति प्रदान गरेको हो ।

उक्त कार्यक्रममा स्व. राणाको जीवनी, उन देशलाई पुर्‍याएको योगदानको चर्चा गर्नुका साथै दिवंगत आत्माको चिरशान्तिको कामना गर्दै बौद्ध धर्मगुरु तथा भिक्षुहरुले गुणानुस्मृति र परित्राण पाठ गर्दै अन्त्यमा पुण्यानुमोदन गरेका थिए ।

कार्यक्रममा कम्पनीका अध्यक्ष मनोहर दास मुल, सञ्चालक विश्वराज रेग्मी, पूर्व सञ्चालक शंकर घिमिरे, प्रमुख कार्यकारी अधिकृत एनपी प्रधानलगायत उपस्थित थिए ।

प्रकाशित समय : १२:२५ बजे