कर्णाली प्रदेशका मुख्यमन्त्री महेन्द्रबहादुर शाहीले कोभिड–१९ को संकट व्यवस्थापनमा सहयोग गर्न विकास साझेदार संस्थाहरुलाई आग्रह गरेका छन् ।

मुख्यमन्त्री तथा मन्त्रिपरिषदको कार्यालयमा बुधवार भएको छलफलमा मुख्यमन्त्री शाहीले रोजगारीको लागि भारत गएका नागरिकहरु फिर्ता भएसंगै कर्णाली प्रदेशमा कोभिड–१९ को संक्रमण बढेको बताउदै सहयोगको लागि दाताहरुलाई आग्रह गरेका हुन् ।

भारतबाट फर्किनेहरुको संख्या ३५ हजार पुगेको बताउदै मुख्यमन्त्री शाहीले क्वारेन्टिन व्यवस्थापन, आईशोलेसन व्यवस्थापन र संक्रमण परीक्षणमा सरकारलाई समस्या परेको जानकारी दिए । उनले कर्णाली प्रदेशबाट झण्डै डेढ लाखको संख्यामा भारत र तेश्रो मुलुकहरुमा रोजगारीको लागि गएको बताउदै अझै पनि १ लाखभन्दा बढी नागरिक कर्णाली फर्कने अनुमान गरिएको बताए ।

‘ठूलो संख्यामा विदेशबाट फर्किएका नागरिकहरुवाट संक्रमण रोक्न निकै चुनौतीपूर्ण छ,’ उनले भने, ‘यो अवस्थामा विकास साझेदार संस्थाहरुको सहयोग आवश्यक छ ।’ शाहीले कर्णाली प्रदेशमा स्थापना गरिएका दुईवटा प्रयोगशाला २४ घण्टा सञ्चालन गर्दा पनि दैनिक ५ सय नमूना मात्र परीक्षण गर्न सकिने बताउँदै प्रयोगशालाको संख्या वृद्धि गर्न आवश्यक रहेको बताए । उनले विकास साझेदार संस्थाहरुलाई कोभिड–१९ को रोकथाम र नियन्त्रणका लागि क्वारेन्टिन र आइसोलेसन व्यवस्था, पिसिआर प्रयोगशालाको स्थापना, परीक्षणका लागि आवश्यक किट र एम्वुलेन्समा सहयोग गर्न आग्रह गरेका हुन् ।

प्रकाशित समय : २१:१४ बजे