गृहपृष्ठ रवीन्द्रको त्यो घातक दस्तावेज विवेकशील साझाले गर्यो खारेज
रवीन्द्रको त्यो घातक दस्तावेज विवेकशील साझाले गर्यो खारेज
काठमाडौं । विवेकशील साझा पार्टीले रवीन्द्र मिश्रको विवादस्पद र घातक दस्तावेज ‘विचार भन्दा माथि देश’लाई खारेज गरेको छ । विवेकशील साझा पार्टीका प्रवक्ता प्रकाशचन्द्र परियार अनुसार, शुक्रबार बसेको विवेकशील साझाको केन्द्रीय समिति बैठकले उक्त दस्तावेज खारेज गरेको हो ।
रवीन्द्र मिश्रको त्यहीँ दस्तावेजकै कारण पार्टी भित्र तीव्र राजनीतिक असहमति सुरु भएको र पार्टी निर्माण र पब्लिक सर्भिस डेलिभरीको आशावादी राजनीतिक मिशन प्रत्युत्पादक भएको निष्कर्ष निकाल्दै दस्तावेज खारेज गर्ने निर्णय गरिएको प्रवक्ता परियारले जानकारी दिए ।
उनका अनुसार, बैठकले सो दस्तावेज सार्वजनिक गरेपछि विचारसँग असहमत पार्टीका केन्द्रीय तथा अन्य समितिका नेतासँग तत्काल छलफल गरेर समस्याको समाधान गर्न अग्रसर हुने निर्णय गरेको छ ।
विवेकशील साझा पार्टीको हालको केन्द्रीय समितिमा रहेका केही नेताहरु पार्टी हित विपरितको गतिविधिमा प्रत्यक्ष संलग्न भएका नेताहरूलाई तत्कालै स्पष्टीकरण सोध्ने र आवश्यक कदम चाल्ने समेत निर्णय भएको विवेकशील साझा पार्टीले जनाएको छ ।
विवेकशील साझा भित्र देखा परेको वैचारिक असहमतिका कारण विगतदेखि नै राजीनामा दिएका, असन्तुष्ट भएर निष्कृय रहेका र वैचारिक संघर्षमा सम्मिलीत पार्टीका नेता तथा सदस्यहरुलाई विवादस्पद र घातक दस्तावेज ‘विचार भन्दा माथि देश’ खारेज गरिसकिएकाले पार्टीमा पुनः सकृय हुन, विवेकशील साझाले अपिल समेत गरेको छ ।
विवेकशील साझा भित्र ‘विचारभन्दा माथि देश’ दस्तावेज ल्याउने रवीन्द्र मिश्र राप्रपा प्रवेश गरेको केही दिन मात्र भएको. छ । राप्रपा प्रवेश गरेर पनि उनले वरिष्ठ उपाध्यक्षको जिम्मेवारी पाएका छन् ।
प्रकाशित समय : १५:४० बजे
