मंसिर ४ बाट कतारमा सुरु हुने फिफा विश्वकप २०२२ का खेलहरु विदेश टीभी च्यानलमा हेर्न नपाइने भएको छ । नेपालभित्र नेपाली टेलिभिजन च्यानलमै अतिरिक्त शूल्क तिरेर हेर्नुपर्ने गरि तयारी गरिएको छ ।

अघिल्ला विश्वकपहरुमा विदेशी टेलिभिजन च्यानलमा खेल हेरिँदै आइएको थियो । तर फिफाले नेपालका लागि यसपटक ‘एक्सक्लुसिभ’ प्रसारण अधिकार मिडिया हबलाई बेचेका कारण विदेशी च्यानलबाट विश्वकप हेर्न नपाइने भएको हो ।

नेपालका लागि विश्वकपको प्रसारण अधिकार मिडिया हबले किनेको छ । जसले केही दिनमै कुन टीभी च्यानलबाट प्रसारण गर्ने टुंगो लगाउने छ ।

तथापी मिडिया हबका अध्यक्ष सोम धितालले हिमालय टेलिभिजनमार्फत् विश्वकप देखाउने गरी समझदारी भइरहेको र केही दिनमै कानुनी प्रक्रिया टुंग्याएर घोषणा गर्ने बताएका छन् ।

विदेशी च्यानलमा हेर्न नमिल्ने गरी नेपालभित्र एक्सक्लुसिभ अधिकार लिँदा ठूलो लगानी गर्नुपरेका कारण यसपटक ‘पे पर भ्यू’ मोडलमा विश्वकप देखाउन लागिएको हो ।

जसअनुसार गत शुक्रबार नेट टीभी र भायनेटले विश्वकप प्रसारणका लागि सम्झौता गरिसकेका छन् । डीसहोम, सुविसु लगायतका एमएसओ र आईपीटीभी सेवा प्रदायकहरुसँग सघन कुराकानी भइरहेको मिडिया हबले जनाएको छ ।

झण्डै एक महिना चल्ने विश्वकप हेर्नका लागि प्रतिसेटअप बक्स करिव ५ सय रुपैयाँ शुल्क लगाउने गरी छलफल भएको बुझिएको छ ।

प्रकाशित समय : १०:१० बजे