धौलागिरि लघुवित्त वित्तीय संस्था लिमिटेडले साउन २४ गतेदेखि निष्कासनमा ल्याएको प्राथमिक सेयर (आइपीओ)मा मागभन्दा साढे ६५ गुणा बढी कित्ताका लागि आवेदन परेको छ ।

सीडीएस एन्ड क्लियरिङ (सीडीएससी)का अनुसार आवेदन दिन अन्तिम दिन आज साँझ ५ बजेसम्म मागभन्दा ६५.६२ गुणा बढी कित्ताका लागि आवेदन परेको हो । कम्पनीले १०० रुपैयाँ अंकित मूल्यका दरले हुन आउने तीन करोड ३१ लाख रुपैयाँ बराबरका तीन लाख ३१ हजार कित्ता आईपीओ सर्वसाधारणका लागि निष्कासन गरेको थियो । तर, आवेदन दिने अन्तिम दिनसम्म दुई करोड १७ लाख २१ हजार ५७० कित्ता आइपीओका लागि आवेदन परेको सीडीएससीले जानकारी दिएको छ ।

उक्त आइपीओ खरिदका लागि १९ लाख ५२ हजार ४६० जना आवेदकबाट आवेदन परेको छ । कम्पनीले निष्कासन गरेको कुल सेयरमध्ये ०.५ प्रतिशत अर्थात् पाँच हजार १५५ कित्ता कर्मचारीहरूका लागि र ५ प्रतिशत अर्थात् १६ हजार ५५० कित्ता सेयर सामूहिक लगानी कोषहरूलाई बाँडफाँट गरिएको छ । बाँकी रहेको तीन लाख नौ हजार २९५ कित्ता आइपीओ मात्र सर्वसाधारणमा बाँडफाँट हुनेछ ।

लगानीकर्ताले न्यूनतम १० कित्तादेखि एक हजार कित्तासम्मका लागि आवेदन दिन पाउने व्यवस्था गरिएको थियो ।

प्रकाशित समय : २०:१३ बजे