स्वास्थ्यमन्त्री भवानीप्रसाद खापुङले एक चिकित्सकको स्वार्थका लागि सहिद गंगालाल राष्ट्रिय हृदयरोग केन्द्रमा अवकाशको उमेर हद बढाउने निर्णय गरेका छन् । मन्त्री खापुङको अध्यक्षतामा शनिबार बसेको सञ्चालक समितिको बैठकले अस्पताललाई पर्न सक्ने आर्थिक भारलाई बेवास्ता गर्दै अवकाशको उमेर हद ६३ वर्ष पुर्‍याउने निर्णय गरेको हो ।

गंगालालका कर्मचारीको सेवा सर्त र सुविधासम्बन्धी नियमावली २०५८ (छैटौं संशोधनसहित) को नियम १०.१ मा कर्मचारीको उमेर ६० वर्ष पुगेपछि अनिवार्य अवकाश दिइने व्यवस्था छ । नियमावलीको त्यही व्यवस्था संशोधन गर्ने निर्णय शनिबार भएको हो ।

अस्पतालका कार्डियोलोजिस्ट डा. रवि मल्ल सोमबार ६० वर्ष पुग्दै छन् । हालको व्यवस्थाअनुसार उनी उमेर हदका कारण स्वतः अवकाशमा जानुपर्ने हुन्छ । तर, मन्त्री खापुङले मल्लकै लागि अवकाशको उमेर हद बढाउन विशेष जोडबल लगाएर निर्णय गराएको स्रोतको भनाइ छ । अस्पतालको सञ्चालक समिति अध्यक्ष स्वास्थ्यमन्त्री रहने व्यवस्था छ ।

मल्ल प्रधानमन्त्री शेरबहादुर देउवानिकट व्यक्ति हुन् । देउवाकै आडभरोसामा स्वास्थ्यमन्त्रीले यो निर्णय लिएको भन्दै अस्पतालभित्रैबाट विरोध भइरहेको छ ।

मुटुको रोगसम्बन्धी स्वायत्त शैक्षिक प्रतिष्ठानका रूपमा विकसित नभईकन उमेर हद मात्र बढाए अस्पतालमा कार्यरत युवा चिकित्सकको समयमा पद बढुवा नहुने र यसले मनोबल गिर्नुका साथै काममा निरुत्साहित हुने वरिष्ठ कन्सल्ट्यान्ट कार्डियोलोजिस्टहरुको भनाइ छ ।

प्रकाशित समय : ११:१२ बजे