संयुक्त राष्ट्रसंघले सुडानमा खाद्य संकट पर्नसक्ने चेतावनी दिएको छ । राष्ट्रसंघले यसअघि पनि कैयौँ पटकसम्म खाद्य संकट पर्न सक्ने बताउँदै आएको छ । खाद्यान्नको अभाव टार्नका लागि आवश्यक पर्ने अन्तर्राष्ट्रिय सहयोग उपलब्ध हुन नसक्ने हो भने छिट्टै खाद्यान्नको अभाव पर्ने राष्ट्रसंघले जनाएको छ ।

राष्ट्रसंघको मानवीय सहायतासम्बन्धी निकायले बुधबार सो कुरा बताएको हो । सो निकायले प्रकाशन गरेको विज्ञप्तिमा छिमेकी देशहरु दक्षिण सुडान, इरिट्रया, इथियोपिया लगायतबाट शरणार्थीहरु आइरहेका तर खाद्यान्नको प्राप्तिका स्रोतहरु नरहेकाले पनि निकट भविष्यमै संकट पर्न सक्ने जनाएको हो ।

खाद्यान्न उत्पादन हुन छोडेको र विदेशी दाताहरुबाट प्राप्त सहयोगले मात्र दैनिक रुपमा चल्ने गरेकोले अवस्था नाजुक बन्दै गएकोले नागरिकमा आन्तरिक रुपमा विस्थापित हुने संख्या पनि बढ्दै गएको पाइएको छ ।

जुनदेखि सेप्टेम्बरसम्मको करिब एक चौथाई जनसख्यां खाद्यान्नको संकटमा पर्ने देखिएको र अब त्योभन्दा पनि बढी हुनसक्ने सो संस्थाले जनाएको छ । हाल सुडानमा आन्तरिक रुपमा विस्थापित भएका बाहेक पनि पाँच लाख ५० हजार शरणार्थीलाई विश्व खाद्य कार्यक्रमले सहयोग गर्दै आएको छ ।

आगामी दिनमा यदि अहिलेजस्तै संकट पर्दै जाने र विदेशी दाताहरुबाट सहयोग प्राप्त नहुने हो भने शरणार्थीलाई दिइँदै आएको सुविधामा पनि कटौती गर्नु पर्ने अवस्था आउने सो कार्यक्रमले जनाएको छ ।

प्रकाशित समय : १३:१५ बजे