साताको कारोबारको अन्तिम दिन शुक्रबार सेयरबजार परिसूचक नेप्से २७.२६ अंकले घटेको छ । आज कारोबारमा आएका २१२ वटा कम्पनीको २३ हजार पटकको कारोबारमा १ अर्ब ४४ करोड ३४ लाख ३२ हजार रुपैयाँ बराबरको ३३ लाख २० कित्ता सेयर कारोबार भएको छ ।

शुक्रबार २०४६.६२ बिन्दुबाट सुरु भएको सेयरबजार कारोबार १.३३ प्रतिशतले घटेर २०१७.४६ बिन्दुमा बन्द भएको हो । बजार घटेसँगै यस दिन ठूला कम्पनीका सूचक मापन गर्ने सेन्सेटिभ परिसूचक पनि ५.४० अंकले घटेर ३८६.२४ बिन्दुमा अडिएका छन् ।

शुक्रबार बजार ओरालो लाग्दा १३ वटै समूहका सूचक राताम्मे भएका छन् । सर्वाधिक व्यापार, होटल्स एण्ड पर्यटन, डेभलपमेन्ट बैंक, म्यानुफ्याक्चर एण्ड प्रोडक्सन र अन्य समूहका सूचक २ प्रतिशतभन्दा बढीले घटेका छन् ।

शुक्रबार १४ वटा कम्पनीका सूचक हरिया देखिएका छन् भने १६४ वटा कम्पनी राताम्मे देखिए । यस दिन सर्वाधिक कमाउनेमा किसान लघुवित्त वित्तीय संस्था छ । कम्पनीको सेयरमूल्य ८ प्रतिशतले वृद्धि भएर प्रतिकित्ता ९४९ रुपैयाँ कायम भएको छ ।

यस्तै, सर्वाधिक सप्तकोसी डेभलपमेन्ट बैंकको सेयरमूल्य ५ प्रतिशतभन्दा बढीले घटेको छ । उक्त कम्पनीको सेयर मूल्य १३ रुपैयाँले घटेर २२६ रुपैयाँ कायम भएको छ । आज सर्वाधिक सेयर कारोबार भने शिवम् सिमेन्टको भएको छ । कम्पनीको २१ करोड २ हजार रुपैयाँ बराबरको कारोबार हुँदा सेयरमूल्य प्रतिकित्ता ७७७ रुपैयाँ कायम भएको छ ।

प्रकाशित समय : १६:१२ बजे