झापा विकास मञ्चले २५ जना विद्यार्थीलाई छात्रवृत्ति प्रदान गर्ने भएको छ । मञ्चले आइतबार विशेष साधारण सभा गरी झापाली समाज यूएसएसँगको समन्वयमा जिल्लाका २५ जना गरिब, सीमान्तकृत तथा जेहेन्दार विद्यार्थीलाई छात्रवृत्ति प्रदान गर्ने निर्णय गरेको हो ।

काठमाडौँको बबरमहलमा सम्पन्न विशेष साधारण सभाले वरिष्ठ अधिवक्ता हरिप्रसाद उप्रेतीको नेतृत्वमा नयाँ कार्यसमिति पनि चयन गरेको छ । समितिको उपाध्यक्षमा भरतकुमार घिमिरे, सचिवमा नारायणप्रसाद पराजुली, कोषाध्यक्षमा जीवनकुमार घिमिरे र सदस्यहरुमा हिराबहादुर खत्री, जीबनाथ प्रसाईं र गंगाप्रसाद भेटवाल सर्वसम्मत चयन भएका छन् ।

झापा विकास मञ्चका निवर्तमान अध्यक्ष वरिष्ठ अधिवक्ता नरेन्द्रप्रसाद पाठकले नेतृत्व हस्तान्तरण गर्दै नयाँ टिमलाई सफल कार्यकालको शुभकामना दिए । त्यस्तै, अध्यक्षता ग्रहण गर्दै वरिष्ठ अध्यक्ष उप्रेतीले ऊर्जाशील नयाँ टिम र अनुभवी पुरानो टिमबाट सहयोग लिँदै मञ्चका गतिविधि अघि बढाउने प्रतिबद्धता जनाए ।

साधारण सभामा सल्लाहकारहरू संस्थापक अध्यक्ष सीताराम उप्रेती, प्रा. लालानाथ सुवेदीलगायतको सहभागिता थियो ।

प्रकाशित समय : ०२:१९ बजे