संसदीय मामिला पत्रकार समाज कर्णाली प्रदेशले डिल स्मृति पत्रकारिता पुरस्कारको लागि अक्षयकोष स्थापना गर्ने निर्णय गरेको छ । समितिको पहिलो साधारण सभाको निर्णयअनुसार संस्थाका संस्थापक सचिव स्वर्गीय डिलप्रसाद शर्माको नाममा दुईलाख रुपैयाँको अक्षय कोष स्थापना हुने भएको हो ।

‘डिल स्मृति पत्रकारिता पुरस्कार’ वितरण गर्न अक्षय कोष स्थापना गर्ने र सो कोषबाट आएको ब्याजबाट संसदीय रिपोर्टिङ गर्ने दुईजना पत्रकारलाई बर्सेनि पुरस्कृत गरिने संस्थाका अध्यक्ष शेरबहादुर थापाले जानकारी दिए । अक्षयकोष सञ्चालन तथा व्यवस्थापनका लागि उपाध्यक्ष देवबहादुर रानाको संयोजकत्वमा तीन सदस्यीय समितिसमेत गठन भएको उनले जानकारी दिए ।

पत्रकार शर्माको बोनम्यारो क्यान्सरबाट गत कात्तिकमा २३ वर्षको उमेरमा निधन भएको थियो । दैलेख घर भएका उनी सुर्खेतमा रहेर पत्रकारितामा सक्रिय थिए ।

साधारण सभाले समितिलाई पनि पूर्णता दिएको छ । अध्यक्षमा शेरबहादुर थापाले निरन्तरता पाएका छन् । उपाध्यक्षमा देवबहादुर राना, सचिवमा सिता कुमारी वली, सहसचिवमा पूर्णबहादुर खड्का, कोषाध्यक्षमा यज्ञ खत्री, सदस्यहरुमा यसकुमार चपाई, सिता आचार्य, बसन्त भण्डारी र रमा केसी निर्विरोध भएका छन् ।

प्रकाशित समय : २२:५४ बजे