नबिल बैंकको केन्द्रीय कार्यालयसहित अन्य १७ ओटा शाखाको शौचालय सर्वसाधारणले निःशुल्क प्रयोग गर्न सक्ने भएका छन् । 

काठमाडौँ महानगरपालिका र नबिल बैंकबीच आगामी पाँच वर्षसम्मका लागि उक्त विषयमा सम्झौता भएको छ । सम्झौताअनुसार नबिल बैंकले आफ्नो केन्द्रीय कार्यालयसहित अन्य १७ ओटा शाखाको शौचालय सार्वजनिकरुपमा प्रयोग गर्न दिने छ । 

तीनधारा दरबारमार्गस्थित केन्द्रीय कार्यालय र १७ ओटा शौचालय प्रयोग गरेबापत बैंकले कुनै शुल्क लिने छैन भने शौचालयको मर्मतसम्भार, सफाइ र पानीको प्रबन्ध बैंकले गर्ने छ । काठमाडौँ महानगरले यसअघि नै सहकार्यमा सञ्चालन गर्ने शौचालय पहिचानका लागि नीलो पृष्ठभूमिको संकेत चित्र तयार गरिसकेको छ । 

संकेत चिन्हमा लोगो रेखाभित्र नीलो पृष्ठभूमि, त्यसको माथिल्लो भागमा नेपाली भाषामा सेतो अक्षरले ‘सार्वजनिक शौचालय’ लेखिएको छ । बीच भागमा सेतो रंगमै महिला र पुरुषको चिन्ह रहेको छ । संकेत चिन्हको पुछारमा अंग्रेजी भाषामा ‘पब्लिक ट्वाइलेट’ लेखिएको छ । 

प्रकाशित समय : ०२:२० बजे