सुनको मूल्य साताको पहिलो दिन आइतबार नेपाली बजारमा घटेको छ । नेपाल सुनचाँदी व्यवसायी महासंघका अनुसार शुक्रबारको तुलनामा आइतबार सुनको मूल्य तोलामा ४०० रुपैयाँले घटेको हो । महासंघका अनुसार आइतबारका लागि छापावाला सुनको मूल्य प्रतितोला ९९ हजार ३०० रुपैयाँ र तेजावी सुनको मूल्य ९८ हजार ८०० रुपैयाँ निर्धारण गरिएको छ ।

गत शुक्रबार सुनको मूल्य तोलाको ९९ हजार ७०० रुपैयाँ र तेजावी सुन ९९ हजार २०० रुपैयाँमा कारोबार भएको थियो । यस्तै आज सुनको मूल्य घटेपनि चाँदीको मूल्य स्थिर बनेको छ । आज अर्थात आइतबारका लागि चाँदीको मूल्य प्रतितोला १ हजार ३६० रुपैयाँ निर्धारण गरिएको छ । गत शुक्रबार पनि चाँदीको कारोबार मूल्य सोही कायम भएर कारोबार भएको थियो । महासंघका अनुसार शुक्रबार सुन तोलामा ८०० रुपैयाँ र चाँदी १० रुपैयाँले बढेर कारोबार भएको थियो ।

महासंघले अन्तर्राष्ट्रिय बजारमा हुने सुन चाँदीको मूल्यको उतारचढावका आधारमा नेपालमा दैनिक सुन तथा चाँदीको कारोबार मूल्य तोक्दै आएको छ । आज अन्तर्राष्ट्रिय बजारमा सुन प्रतिऔंस १ हजार ९२५ डलर र चाँदी प्रतिऔंस २४ दशमलव ६२ डलरको हाराहारीमा कारोबार भइरहेको छ ।

प्रकाशित समय : १६:५२ बजे