ताप्लेजुङ जिल्ला अस्पतालमा बिहिबार राति साढे १० बजेतिर हिमाली कालो भालुको प्रवेश भयो । अस्पतालको प्रसुति कक्षमै भालु छिरेपछि विरामी र अस्पतालका कर्मचारी आतंकित बने । भालुलाई त्यहीदिन अस्पतालको प्रसुति कक्षमै थुनियो । दुई रात भालुले अस्पतालको त्यही कक्षमा विताएको छ ।

उसकाे बसाइ अझै लम्बिएको छ । शनिबारको रात र आइतबार पनि भालुको बास अस्पतालमै हुने भएको छ ।

उद्धाका लागि वन्यजन्तुको प्राविधिक टोली चितवनबाट बोलाइएको छ । टोली आइतबार मात्रै आइपुग्ने भएकाले भालुको अस्पताल बसाइ लम्बिने भएको हो ।

बिरामी सुतेको मौका पारेर शुक्रबार राति ढोका खोलिदिएर भालुलाई बाहिर पठाउने कि प्राविधिक टोली बोलाउने भन्ने विषयमा छलफल भएको थियो । अस्पतालमै छोड्दा सेवाग्राही आतंकित हुने भएकाले टोली नै बोलाउने निष्कर्षमा पुगेको डिभिजन वन कार्यालय ताप्लेजुङका प्रमुख वीरेन्द्र साहले बताए ।

उनका अनुसार शुक्रबार तयारी पूरा गरेर प्राविधिक टोली शनिबार बिहानै चितवनबाट हिँड्ने भएको छ । वन्यजन्तुलाई बेहोस बनाएर उद्धार गर्ने टोली चितवन, बर्दिया र काठमाडौंमा मात्रै छ । उद्धार टोलीमा एक भेटेरिनरी डाक्टर, एक वन्यजन्तु विज्ञ र २र३ जना फिल्ड स्तरको कर्मचारी हुन्छन् ।

प्रकाशित समय : १५:५७ बजे