कतार विश्वकप २०२२ सुरु हुन करिब एक वर्षभन्दा बढी समयावधि र छनोटका कयौ खेल बाँकी छँदा नै ब्राजिलले दक्षिण अमेरिकी क्षेत्रबाट आगामी विश्वकपमा स्थान बनाएको छ । शुक्रबार बिहान कोलम्बियाविरूद्ध १-० को जित निकाल्दै ब्राजिल दक्षिण अमेरिकाबाट कतार विश्वकप २०२२ मा छनोट हुने पहिलो राष्ट्र बनेको छ । दक्षिण अमेरिकाबाट चार राष्ट्र विश्वकपमा छनोट हुन पाउने फिफाकाे नियमअनुसार अब तीन राष्ट्रले उक्त दाबेदारी प्रस्तुत गर्नेछन् ।

ब्राजिलले भने १२औं खेलसम्म अपराजित यात्रा कायमै राख्दै पाँच खेलअगावै विश्वकप २०२२ मा स्थान बनायो । घरेलु मैदान साओ पाउलोमा लुकास पाक्वेटाले ७२औं मिनेटमा गरेको गोल नै ब्राजिलको जितका लागि पर्याप्त बन्यो । १२ खेलबाट ब्राजिलले ११औं जित निकाल्दा एक बराबरी आत्मसात् गरेको छ । यो सफलतासँगै ब्राजिलले दोस्रो स्थानको अर्जेन्टिनासँग ९ अंक, तेस्रोको इक्वेडरसँग १४ अंक र चौथो स्थानको चिलीसँग १४ अंकको अग्रता बनायो । पाँच खेल बाँकी छँदा चिली र कोलम्बियाले १५ अंक मात्र बटुल्ने अंकगणितीय समीकरणका कारण शुक्रबारको खेलपछि ब्राजिलले विश्वकप यात्राका लागि बाँकी खेलकाे नतिजा कुर्नु परेन ।

विश्वकप छनाेटमा पाएकाे सफलतासँगै ब्राजिली खेलाडीले ड्रेसिङ रुममा कतारको झन्डा हल्लाएका थिए । साथै उनीहरूको सफलतामा विश्व फुटबल महासंघ फिफा र दक्षिण अमेरिकी फुटबल महासंघले पनि बधाई दिएका थिए ।

प्रकाशित समय : १९:०५ बजे