लामो समयदेखि कुर्सी बचाउने कसरतमा लागेका कर्णाली प्रदेशका मुख्यमन्त्री महेन्द्रबहादुर शाहीले पद छोड्ने भएका छन् । मुख्यमन्त्री महेन्द्रबहादुर शाहीले राजीनामा दिने भएका हुन् । उनले साँझसम्म राजीनामा दिने प्रदेश सरकारका एक मन्त्रीले जानकारी दिए । आज साँझ पाँच बजे मन्त्रिपरिषद् बैठक पनि बस्दै छ । यसपछि उनले राजीनामा दिने छन् ।

सत्ता साझेदार नेकपा एमालेले २०७७ चैत ४ गते माओवादी केन्द्र नेतृत्वको सरकारलाई दिएको समर्थन फिर्ता लिएपछि अल्पमतमा परेका शाही कांग्रेसको सहारामा पदमा आसिन थिए । २०७७ फागुन २३ गते सर्वोच्च अदालतले नेकपा खारेज गरी दुई पार्टी (एमाले र माओवादी केन्द्र) लाई साविककै अवस्थामा पु-याइदिएको थियो । त्यसपछि उत्पन्न राजनीतिक परिस्थितिका कारण एमाले सरकारबाट बाहिरिएको थियो ।

मुख्यमन्त्री शाहीले २०७८ वैशाख ३ गते संसदमा पेश गरेको विश्वासको प्रस्तावमा तत्कालीन प्रमुख प्रतिपक्ष नेपाली कांग्रेस र एमाले माधव (समूहका) चार जना प्रदेशसभा सदस्यले उनको पक्षमा मतदान गरे । जसले गर्दा मुख्यमन्त्री शाहीको पद जोगियो । संसदबाट विश्वासको मत आर्जन गरेपछि कर्णाली सरकारमा उनको दोस्रो इनिङ सुरू भएको थियो । अहिले कांग्रेसका जीवनबहादुर शाहीको इनिङ हुने भए पनि उनी बाहिरिन लागेका हुन् ।

गत वैशाख ३ गते मुख्यमन्त्री महेन्द्रबहादुर शाहीले संसदमा पेश गरेको विश्वासको प्रस्तावमा समर्थन गरेपछि सोही गुनको पैँचो तिर्न जीवनबहादुर शाहीलाई मुख्यमन्त्री पदका लागि उनले मार्ग प्रशस्त गरेका हुन् ।

प्रकाशित समय : ००:०७ बजे