नेपाली कांग्रेसको १४औँ महाधिवेशनअन्तर्गत चितवन जिल्लाका ९० वडाका अधिवेशन सम्पन्न भएका छन् । तीमध्ये ८३ सर्वसम्मत् र ७ मा निर्वाचनमार्फत वडा समिति र क्षेत्रीय प्रतिनिधि छनोट गरिएको हो ।

कांग्रेस जिल्ला सभापति जीतनारायण श्रेष्ठले बाँकी ८ वडामा आज निर्वाचनको प्रक्रिया सुरुआत भएको जानकारी दिए । बाँकी रहेका वडामा राप्ती नगरपालिका-६, खैरहनी नगरपालिका-४, भरतपुर महानगरपालिका-४, ६, ७, १५, र १९ छन् । यस्तै माडी नगरपालिका-१ मा निर्वाचन आजै हुँदै छ । राप्ती र खैरहनीमा निर्वाचनको प्रक्रिया सुरु भइसकेको उनले बताए । भरतपुर-४ र माडी-१ मा वडा समिति टुंगिएको र क्षेत्रीय प्रतिनिधिका लागि सर्वसम्मत्को प्रयास भइरहेको छ । अन्य बाँकी रहेका वडामा निर्वाचनको प्रक्रिया सुरु भइसकेको उनले बताए ।

सभापति श्रेष्ठकाअनुसार आज र भोलिमा वडा अधिवेशन टुंगो लाग्ने छ । जिल्लामा रहेका सात पालिकामा ९८ वडा छन् । वडा अधिवेशन सकिएसँगै नगर अधिवेशनको तयारी गरिने छ । महाधिवेशनकै सिलसिलामा यही भदौ २७ गते नगर अधिवेशन हुने छ । जिल्लामा एउटा महानगरपालिका, पाँच नगरपालिका र एउटा गाउँपालिका छन् । अगामी असोज १ गते प्रदेशको अधिवेशनले प्रदेश महाधिवेशन प्रतिनिधि र प्रदेश कार्यसमिति बनाउने छ । असोज ५ गते क्षेत्रको अधिवेशन हुने निर्वाचन तालिका छ । तालिका अनुसार असोज १० गते जिल्ला अधिवेशन हुने छ । जिल्ला सभापति पदमा ८ जनाको दाबी गरिरहेका छन् ।

प्रकाशित समय : १८:५४ बजे