महानगरीय ट्राफिक प्रहरी महाशाखाले रातको समयमा तीब्रगतिका कारणले हुने सडक दुर्घटना न्यूनिकरण गर्न ‘नाइट भिजन लेजर स्पीड गन’ सहितको चेकिङ सुरु गरेको छ । विशेषगरी कोटेश्वर-सुर्यबिनायक सडक, रिङरोड र चौडा सडकहरुमा तीब्र गतिमा सवारी चलाई दुर्घटना हुने गरेको तथ्यलाई मध्यनजर गर्दै ट्राफिक प्रहरीले दिनको समयमा लेजर गनको प्रयोग गरि तीब्रगति नियन्त्रणको अभियान सुरु गर्दै आएको छ ।

'दैनिक रुपमा दिउँसो हुने चेकिङमा तीब्रगतिमा सवारी चलाउने ३५/४० जना चालकलाई लेजर गनमार्फत कारबाही गर्दै आएका छौ, अब भने रातको समयमासमेत ओभरस्पिड चेकिङ गरी गति नियन्त्रण गर्ने अभियान पहिलो पटक सुरु गरेका छौँ ।' महाशाखाका एसएसपी जनक भट्टराईले भने । उनले तीब्रगतिमा सवारी चलाउने चालकहरुलाई कारबाहीको साथै सचेत गराएको जानकारी दिए ।

स्पीड गन प्रयोगमा ल्याएकै दिन सातदोबाटो ग्वार्को क्षेत्रमा ओभर स्पीडमा सवारी चलाउने धेरै सवारी चालकहरुलाई नियन्त्रणमा लिई सचेत गराएको र नाईट स्पीड चेकिङलाई कडाईका साथ लगिनेसमेत महाशाखाले जानकारी दिएको छ । तीब्रगतिमा सवारी साधन चलाउँदा आफुलाई मात्र नभइ अन्य सडक प्रयोगकर्तालाई समेत जोखिम हुने र दुर्घटनाको सम्भावना अत्याधिक हुने भएकोले तीब्रगति र लापरबाहीकासाथ सवारी नचलाउन सम्पुर्ण सवारी चालकहरुलाई महाशाखाले अनुरोधसमेत गरेको छ ।

प्रकाशित समय : १९:१९ बजे