संवैधानिक परिषद्को आइतबार बिहान बसेकाे बैठकले पूर्वसचिव माधवप्रसाद रेग्मीलाई लोकसेवा आयोगको अध्यक्षमा सिफारिस गरेको छ । पाँच वर्षअघि आयोगको सचिवबाट अवकाश पाएका ५९ वर्षीय रेग्मी झापाको गौरादह नगरपालिका ३ का बासिन्दा हुन् ।

नेपाली कांग्रेसका सभापति शेरबहादुर देउवाको कोटामा रेग्मीलाई अध्यक्षमा सिफारिस गरेको स्रोतकाे दाबी छ । रेग्मीले विभिन्न पदमा रहेर आठ वर्ष आयोगमा काम गरेका छन् । उनी सर्वोच्च अदालतका न्यायाधीश कुमार रेग्मीका सहोदर दाजु हुन् । फागुन २३ गते नेकपा नाम विवादमा रेग्मी सहितको संयुक्त इजलासले एमाले र माओवादी केन्द्र ब्युँताउने फैसला सुनाएको थियो ।

प्रकाशित समय : २०:४१ बजे