राष्ट्रपति विद्यादेवी भण्डारीले बिमस्टेक राष्ट्रका राष्ट्र तथा सरकार प्रमुखको सम्मानको लागि सामूहिक भेटवार्ता र दिवा भोजको आयोजना गरेकी छन् । यसको लागि मध्यान्ह सातै देशमा राष्ट्र तथा सरकार प्रमुख शीतल निवास पुग्नेछन् ।

प्रधानमन्त्री केपी ओली र बंगलादेशकी प्रधानमन्त्री शेख हसिनाबीच बिहीबार बिहान भेटवार्ता भएको छ । बहुक्षेत्रीय प्राविधिक तथा आर्थिक सहयोग्का लागि बङ्गालको खाडीको प्रयास (बिमस्टेक) को चौथो शिखर सम्मेलनको अबसरमा नेपाल आएकी हसिनासँग प्रधानमन्त्री ओलीले द्वीपक्षीय बार्ता गरेका हुन् ।

राष्ट्रपति भण्डारीले आयोजना गरेको दिवाभोज सकेर बिमस्टेक सम्मेलनका लागि आएका पाहुनाहरु होटल सोल्टीमा जाने तयारीमा छन् । बिम्स्टेकको चौथो शिखर सम्मेलनमा सहभागी हुन नेपाल आएका विदेशी पाहुनाहरु केहीबेरपछि होटल सल्टी पुग्नेछन् ।

सम्मेलन स्थल होटल सोल्टी होटल वरपर सुरक्षा व्यबस्था कडा छ भने आकर्षक सजावट गरिएको छ । उनीहरुको स्वागतमा राष्ट्रपतिले दिवाभोज आयोजना गरेकी हुन् ।

शीतल निवास पुगेका पाहुनाहरुलाई केहीबेरअघि राष्ट्रपति भण्डारीले स्वाग गरेकी हुन् । उपराष्ट्रपति नन्दबाहदुर पुन र प्रधानमन्त्री केपी शर्मा ओली पनि शीतल निवास दिवा भोजमा सहभागी छन् ।

काठमाडौंमा आयोजना भएको चौथो सम्मेलनमा सहभागी हुन सबै सदस्य राष्ट्रहरुका कार्यकारी सरकार प्रमुखहरु नेपाल आएका छन् । सन् १९९७ मा स्थापना भएको संगठनमा बंगलादेश, भुटान, भारत, म्यानमार, नेपाल, श्रीलंका र थाइल्याड सदस्य राष्ट्र हुन् ।

स्थापनाकालमा मन्त्रीस्तरीय सम्मेलन गर्ने सहमति भएकोमा सन् २००४ बाट कार्यकारी प्रमुखहरुको शिखर सम्मेलन आयोजना गर्ने सहमति भएको थियो । सोही वर्ष बैंककमा पहिलो शिखर सम्मेलन आयोजना भएको थियो भने दोस्रो सम्मेलन सन् २००८ मा नयाँ दिल्लीमा भएको थियो । म्यानमारको राजधानी न्याप्यिदोमा सन् २०१४ मा तेस्रो सम्मेलन आयोजना भएको थियो ।

प्रकाशित समय : २०:०० बजे