अनुचित रुपमा नागरिकहरुमाथि करको बोझ थोपरिएको भन्दै नेपाली कांग्रेसले बुटवलमा प्रदर्शन गरेको छ । सडकमा केन्द्रदेखि स्थानीय तहले बढाएको करविरुद्ध चर्का नारा लगाउदै प्रदर्शनमा उत्रिएको कांग्रेसले बुटवल उपमहानगरपालिकालाई ज्ञापन पत्र बुझाएको छ ।

बुटवलको अस्पताल लाइनमा भेला भएका कांग्रेस नेता कार्यकर्ता र शुभेच्छुकहरु नारा जुलुस गर्दै बुटवल उपमहानगरपालिका पुगेका थिए । उनीहरुले उप–महानगरपालिकाका प्रमुख शिवराज सुवेदीलाई कार्यकक्षमा गएर ज्ञापन पत्र बुझाएका हुन् ।

नगरप्रमुख सुवेदीलाई ज्ञापन पत्र बुझाउदै कांग्रेस नगर सभापति खेलराज पाण्डेले बहुमतको नाममा सहमति र सहकार्य संस्कृति त्यागेर उपमहानगरपालिका एकलौटी रुपमा अघि बढेको र जनताले थेग्नै नसक्ने गरी कर बढाएकाले बाध्य भएर आन्दोलनमा उत्रिएको बताएका थिए । ज्ञापन पत्र बुझ्दै नगर प्रमुख सुवेदीले दल, संघ सस्था वा नागरीक समाज कसैलाई उपेक्षा गरी उपमहानगरपालिका अघि नबढेको दावी गरे । उनले सबैसँग मिलेर सहकार्य गरेर अघि बढे मात्र बुटवलको विकास र समृद्धि सम्भव रहेको बताए ।