अफगानिस्तानमा मंगलबार भीषण आत्मघाती आक्रमण भएको छ । सन् २००१ मा सत्ताबाट बाहिरिएपछि त्यहाँ हुने गरेका प्रायः हिंसा घटनामा तालिबान विद्रोही समूहको हात रहँदै आएको छ । तर, सन् २०१४ पछि इस्लामिक स्टेट (आईएस) समूहको पनि बिगबिगी बढ्न थाल्यो र बारम्बार ठूला आक्रमण हुँदै आएका छन् ।

अफगानिस्तानमा सन् २००७ देखि २०१८ सम्मका भीषण आतंककारी हमला
सन् २०१८ को सेप्टेम्बर ११ मा नानगाहार प्रान्तको पूर्वीक्षेत्रमा विस्फाट भयो । सो विस्फोटमा ६८ जनाको मृत्यु हुनुका साथै एक सय ६५ जना घाइते भए । सो नरसंहारको जिम्मा अहिलेसम्म कसैले लिएका छैन । तर, नानगाहार प्रान्तमा अतिवादी इस्लामिक स्टेट नै सक्रिय छ । इस्लामिक स्टेटले पछिल्ला समयमा भएका सबैजसो बम हमलाको जिम्मेवारी लिँदै आएको छ ।

सन् २०१८ को जनवरीमा काबुलको प्रमुख शहरमा भएको एक विस्फोटमा एक सयभन्दा बढीको मृत्यु भएको थियो । मारिएका प्रायः सर्वसाधारण थिए । सो आक्रमणको जिम्मा तालिबानले लिएको थियो ।

सन् २०१७ को अक्टोबरमा तालिबान समूहले दुई छुट्टाछुट्टै इलाकामा गरेको आत्मघाती बम हमलामा करिब ८० जनाको मृत्यु भयो । मृतक अधिकांश सेना र प्रहरी थिए भने थुप्रै सुरक्षा अधिकारी घाइते भएका थिए ।

पाक्टिया प्रान्तको गाडैज शहरमा प्रहरी परिसरमा भएको बम आक्रमण हुँदा ६० सुरक्षा अधिकारीको मृत्यु भएको थियो । सोही दिन घाज्नी प्रान्तमा एम्बुस आक्रमण भयो । जहा १५ जना सुरक्षा अधिकारी र पाँच सर्वसाधारको ज्यान गयो ।

यस्तै, सन् २०१७ को मे ३१ मा काबुलमा भएको बम आक्रमणमा एक सय ५० भन्दा बढीको मृत्यु भएको थियो ।

२०१७ कै अप्रिल २७ मा अफगानिस्तानको उत्तरी शहर मजार इ सरिफमा सैनिक पोशाकमा प्रवेश गरी सैन्य शिविरको मस्जिद र डिनर हलमा गरिएको आक्रमणमा एक सय ४४ जनाको मृत्यु भएको थियो ।

२०१७ मार्च ८ मा अफगानिस्तानको सबैभन्दा ठुलो सैनिक अस्पतालमा आइएस विद्रोहीले आक्रमण गरे । जहाँ ५० जनाको ज्यान गएको सार्वजनिक गरिए पनि अनुसन्धानकर्ताले भने सय जनाको मृत्यु भएको दाबी गरेका थिए ।

सन् २०१६ मा जुलाई २३ मा काबुलको सिया मुसलमान गाउँमा भएका दुई विस्फोटमा ८५ जनाको मृत्यु भएको थियो भने २ सय ३१ जना घाइते भएका थिए ।

अप्रिल १९ मा मध्य काबुलमा तालिबान लडाकूले गरेको ट्रक बम हमलामा ६४ जनाले ज्यान गुमाएका थिए । सो हमलामा तीन सय ४० गम्भीर जना घाइते भए ।

सन् २०११ डिसेम्बर ६ मा अशुरा पर्वको बिदाको दिनमा काबुलमै मुसलमान समुदाय लक्षित आक्रमण भयो । सो हमलामा ८० जना मारिए । सोही दिन दोस्रो आक्रमण मजार इ सरिफको एक शहरमा भएको थियो । जहाँ चार जनाले ज्यान गुमाए । उक्त आक्रमणको जिम्मेवारी लिन तालिबान लडाकूहरुले अस्वीकार गरे ।

सन् २००८ जुलाई ७ मा भएको आत्मघाती कारबम आक्रमणमा ६० जना मारिएका थिए । तीमध्ये पाँच जना भारतीय नागरिक थिए । सो घटनामा १ सय ५० जना घाइते भएका थिए । तालिबानले घटनाको जिम्मेवारी लिन अस्वीकार गरेको थियो ।

फेब्रुअरी १७ तारिखका दिन कान्दाहारको एक शहरमा भएको आत्मघाती आक्रमणमा एक सय ४० जनाको मृत्यु भएको थियो । तीमध्ये ५० जना सहायक प्रहरी अधिकृत थिए ।

सन् २००७ नोभेम्बर ६ तारिखमा काबुलको उत्तरी क्षेत्रमा पर्ने इ खुम्रीमा रहेको एक चिनी कारखाना अवलोकन गर्न पुगेका बालबालिका र सांसदको टोली लक्षित बम आक्रमणमा ५९ बालबालिका र पाँच सांसदसहित ७९ जना मारिए । सो घटनाको जिम्मेवारी पनि कसैले लिएन । संसदीय चुनाव नजिकिँदै गएको अफगानिस्तानमा पछिल्लो पटक हिंसात्मक आक्रमणका शृंखला बढेका छन् ।

(एजेन्सी)

प्रकाशित समय : १५:५९ बजे