सरकारले एसियाली खेलकुदमा रजत पदक विजेता प्याराग्लाइडिङका खेलाडीहरुलाई जनही पाँच लाख रुपैयाँ नगदसहित सम्मान गरेको छ । काठमाडौंमा सोमबार नगरपरिक्रमासहित पदक विजेता खेलाडी, प्रशिक्षक तथा संघलाई सम्मान गरिएको हो ।

इन्डोनेशियाको जाकार्तामा हालै सम्पन्न एसियाली खेलकुदमा सहभागी भएर प्याराग्लाइडिङतर्फ रजत जित्ने नेपाली टोलीका कप्तान बिमल अधिकारी, युकेश गुरुङ, सुशील गुरुङ, विजय गौतम र विशाल थापाले सम्मानस्वरुप जनही ५ लाख रुपैयाँ पाए ।

राष्ट्रिय खेलकुद परिषदले पदक विजेता खेलाडीलाई जनही ५ लाख र मुख्य प्रशिक्षकलाई ३ लाख रुपैयाँ नगदसहित सम्मान गरेको छ । यस्तै, सहायक प्रशिक्षकलाई १ लाख ५० हजार र प्याराग्लाइडिङ संघलाई ५ लाख प्रदान गरिएको छ ।

पुरस्कार प्रदान गर्नुअघि रजत पदक विजेता खेडालीहरुलाई राष्ट्रिय खेलकुद परिषदको आह्वानमा काठमाडौंमा नगर परिक्रमसमेत गरिएको थियो । राखेपले आयोजना गरेको नगरपरिक्रमा त्रिपुरेश्वर हुँदै सुन्धारा, रत्नपार्क, पुरानो बसपार्कबाट राष्ट्रियसभा गृहमा पुगेर सम्पन्न भएको थियो ।

त्यसपछि राष्ट्रिय सभा गृहमा युवा तथा खेलकुदमन्त्री जगत विश्वकर्माले रजत पदक विजेता खेलाडीहरुलाई जनही ५ लाख नगदसहित सम्मान गरे । त्यसक्रममा उनले नेपाली खेलाडीहरुलाई उचित वातावरण बनाउन सक्दो पहल गर्ने प्रतिवद्धता व्यक्त गरे । ‘नेपालको खेलकुद क्षेत्रको विकासमा आवश्यक पहल कदमी लिन म सबैलाई आग्रह पनि गर्न चाहान्छु ।’ उनले भने ।

कार्यक्रममा मन्त्री विश्वकर्मासँगै राखेप सदस्य सचिव केशवकुमार विष्ट, ओलम्पिक कमिटिका अध्यक्ष जिवनराज श्रेष्ठलगायत उपस्थित थिए । राखेप सदस्य सचिव विष्टले प्याराग्लाइडिङका खेलाडीले नेपाली खेलकुदको शिर उचो बनाएको बताए ।

‘यस खेलको विकास र प्रवद्र्धनमा सरकारले सहयोग गर्नेछ,’ उनले भने । इन्डोनेशियामा आयोजित एसियाली खेलकुद प्रतियोगितामा नेपालले २० वर्षपछि पदक हात पारेको हो । बीस वर्षअगाडि सविता राजभण्डारीले बैंकक एशियाली खेलकुदमा तेक्वान्दोबाट नेपाललाई पहिलो पटक ऐतिहासिक रजत पदक दिलाएकी थिइन् ।

तर, पोखरामै सीमित मानिएको प्याराग्लाइडिङले खेल ले ठीक २० वर्षपछि जकार्ता एशियाली खेलकुदमा रजत पदकको इतिहास दोर्होयाएको हो । पोखराको आकाशमा झन्डै दुई दशकको अनुभवबाट खारिएका खेलाडीहरूले इन्डोनेशियाको पहाडी पर्यटन क्षेत्र गुनुङ मास कुन्काकको आकाशमा त्यो इतिहास बनाएका हुन् ।

नेपालका लागि यो ऐतिहासिक पदक कप्तान विमल अधिकारी, विशाल थापा, विजय गौतम, सुशील गुरुङ र युकेश गुरुङले पुरुष टिम त्रस कन्ट्री इभेन्ट्समा जितेका हुन् । एशियाली खेलकुदमै प्याराग्लाइडिङ समावेश गरिएको यो पहिलो पटक हो ।